Tuesday, November 13, 2012

အပစ် ရပ်စဲထားသော SSPP နှင့် အစိုးရ တိုက်ပွဲပြင်းထန်



ရွှေဟင်္သာသတင်းဌာန

အစိုးရနှင့် အပစ် ရပ်ထားသော ရှမ်းပြည် တိုးတက်ရေး ပါတီ (SSPP) နှင့် အစိုးရ တပ်ဖွဲ့ တို့သည် ရှမ်းပြည် မြောက်ပိုင်း ကျောက်မဲခရိုင်၊ မိုးမိတ် မြို့နယ်နှင့် မိုင်းငေါ့ကြား၌ (၅) နာရီကြာ တိုက်ပွဲ ပြင်းထန် ခဲ့သည်ဟု အမည် မဖေါ် လိုသော SSPP ပြောခွင့်ရသူ ဗိုလ်မှူးကြီး တဦးက ဆိုပါသည်။

“အစိုးရ ဖက်ကတော့ တပ်ရင်း (၆) ရင်း သုံးပြီးတော့ ကျနော်တို့ တပ်မဟာ (၆၁၂) ကို စစ်ဆင်တာ ဖြစ်တယ်။ တိုက်ပွဲ တွေက ကြာလည်း ကြာသလို ပြင်းလည်း ပြင်းထန်တယ်။ လွိုင်လင့် တွတ်ဇံ ကျောက်မဲခရိုင် တောင်ကုန်းကို ဝင်တိုက် တာ (၅) နာရီလောက် ကြာသွားသလို၊ မိုင်းငေါ့နယ်မြေမှာ ရှိတဲ့ ကွန်ဖလမ်းပန်လော့ မှာဆိုရင် တိုက်ပွဲက (၂) နာရီ ခွဲကြာခဲ့ တယ်လေ။ အသေ အပျောက်တော့ နှစ်ဖက်စလုံး ရှိတယ်။ အတိအကျတော့ မပြောနိုင်သေးဘူး” ဟု ဆိုပါသည်။


တိုက်ပွဲ များသည်၊ အောက်တိုဘာ (၃၁) ရက်နေ့မှ စတင်လာပြီး၊ နိုဝင်ဘာလ (၂) ရက်နေ့၊ (၄) ရက်နေ့နှင့် (၉) ရက်နေ့၌ အပြင်းထန်ဆုံး ဖြစ်ခဲ့သည်ဟု ဆိုပါသည်။ (၉) ရက်နေ့၌ ဖြစ်ပွားသော တိုက်ပွဲမှာ နံက်(၈)နာရီမှ မွန်းလွဲ တနာရီထိ ကြာခဲ့ ပါသည်။

စစ်ဆင်ရေး၌ ပါဝင်သော အစိုးရ တပ်ဖွဲ့များမှာ ခမရ (၅၀၁), (၅၀၂), (၅၀၃)၊ ခလရ (၂၃)၊ ခလရ (၇၁) အောင်လံနှင့် ခလရ (၉၅) မန္တလေး အခြေစိုက် တပ်ဖွဲ့တို့ ဖြစ်ပါသည်။ ဤစစ်ဆင်ရေးသည်  အင်အား (၃၀၀) ကျော်ရှိသော SSPP တပ်မဟာ (၆၁၂) ကို အင်အား (၅၀၀) ကျော်နှင့် အစိုးရ တပ်ဖွဲ့က စစ်ဆင်နေခြင်းဖြစ်သည်ဟု SSPP ဖက်မှ ခန့်မှန်း ထားပါသည်။ တိုက်ပွဲ များသည်၊ တရုတ်ပြည်သို့ သွယ်တန်းထားသော နမ့်ခမ်းမြို့နယ် ချထားသော ရွှေဂက်ပိုက်လိုင်းတ လျှောက် ဖြစ်ပွားခြင်း ဖြစ်ပါသည်။

ဤတိုက်ပွဲ ကိစ္စကို နိုဝင်ဘာ (၉) ရက်နေ့၌ ထိုင်းနိုင်ငံ ဇင်းမယ်မြို့ကို ရောက်လာခဲ့သော ပြည်ထောင်စု အဆင့် ငြိမ်းချမ်းမှု ဖေါ်ဆောင်ရေး အဖွဲ့ ခေါင်းဆောင် ၀န်ကြီး ဦးအောင်မင်းအား အလွတ် သဘော တင်ပြ နိုင်ခဲ့သော်လည်း တစုံတရာ ပြန်လည် ပြောကြားခြင်း မရှိဟု ဆိုပါသည်။

အစိုးရသည် SSPP နှင့် အပစ်အခတ် ရပ်စဲထားသည့် အတွက် တွေ့ဆုံ ဆွေးနွေးမှုများ ရှိသည် ဆိုသော်လည်း တိုက်ပွဲ ဖြစ်ပွားနေသည့် ကိစ္စ၊ ရာဇသံ အပေး ခံရခြင်းကိစ္စများနှင့် SSPP တပ်သားများ ဖမ်းဆီးခြင်း ကိစ္စများကို ဖြေရှင်း ပေးခဲ့ခြင်း မရှိခဲ့ပေ။ http://www.phophtaw.org/burmese/index.php/news/local-news/2220-sspp-----.html

SSPP သည် အရှေ့ အလယ်ပိုင်းတိုင်း တိုင်းဌာနချုပ်တွင် ပြီးခဲ့သည့် အောက်တိုဘာ (၃၁) ရက်နေ့၌ နောက်ထပ်ဆက်ဆံ ရေးရုံးသစ်ကို ဖွင့်လှစ် ခဲ့ပါသည်။ ဤကဲ့သို့ တွေ့ဆုံ ဆွေးနွေးပွဲ ကျင်းပနေခြင်းနှင့် ဆက်ဆံရေး ရုံးများကို တိုးချဲ့နေသော် လည်း နှစ်ဖက်အကြား ဖြစ်ပေါ် နေသော တိုက်ပွဲပြသနာများကို  ဖြေရှင်းခြင်း မရှိပေ။ http://www.phophtaw.org/burmese/index.php/news/local-news/2302-sspp-.html

SSPP နှင့် အစိုးရတို့သည် ၂၀၁၂ခုနှစ် နှစ်ဆန်း ကတည်းက အပစ်အခတ် ရပ်စဲ ခဲ့သော်လည်း ယနေ့အထိ တိုက်ပွဲပေါင်း (၅၀) ထက်မနဲ ဖြစ်ပွားခဲ့ပြီး ဖြစ်ကြောင်း SSPP တို့ကဆိုပါသည်။ ဤသည် အစိုးရ၏ ပြည်တွင်း ငြိမ်းချမ်းရေး သဘောထား များလားဟု မေးစရာဖြစ်နေကြောင်း စစ်ရေး အကဲခတ်များက ဆိုပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။