ကရင် အမျိုးသား အစည်းအရုံး အတွင်း စည်းရုံးရေး ပြသနာနှင့် ပြည်တွင်း ငြိမ်းချမ်းရေး အပိုင်း (၁၊ ၂၊ ၃၊ ၄)

ကရင် အမျိုးသား အစည်းအရုံး (ကေအင်ယူ) ၏ ထိပ်ပိုင်း ခေါင်းဆောင် သုံးဦးအား တာဝန်များမှ ထုတ်ပယ် လိုက်သည့် သတင်းများ ထွက်ပေါ်လာပြီးနောက် အဖွဲ့အစည်းအနေဖြင့် ကွဲပြဲ တော့မည်လား ဟူသော စိုးရိမ် ပူပန်မှုများသည် စာရေး သူ အပါအ၀င် လူထုများ အတွင်း အတော်ပင် ကြီးမားစွာ ဖြစ်ပေါ်လျှက် ရှိသည်။ အဘယ်ကြောင့်ပါနည်း။

 ရှစ်လေးလုံး အရေးတော်ပုံကြီး ပြီးသည့်နောက် ထောင်ပေါင်း များစွာ သော ကျောင်းသား၊ ပြည်သူ များသည် တိုင်းရင်း သား လက်နက်ကိုင် တော်လှန်ရေး အင်အားစုများ အခြေပြုရာ ဒေသများသို့ လည်းကောင်း၊ ဗမာပြည်ကွန်မြူနစ်ပါတီ အခြေစိုက်ရာ ရှမ်းပြည်အရှေ့မြောက်ဒေသရှိ လွတ်မြောက် နယ်မြေသို့လည်းကောင်း ရောက်ရှိခိုလှုံခဲ့ကြရာ စာရေးသူ လည်း တဦး အပါဝင်ဖြစ်ခဲ့သည်။ လက်နက်ကိုင် တော်လှန်ရေးနှင့် အခြား နည်းလမ်း ပေါင်းစုံ သုံးပြီး စစ်အာဏာရှင် စနစ်အား ဆက်လက် တိုက်ပွဲဝင်ရန် ကြိုးပမ်း ခဲ့ကြသည်။ တော်လှန်လိုသည့် ကျောင်းသားများ၊ လူထုများအား ကောင်းမွန်စွာ လက်ခံကြိုဆို နေရာချထားပြီး တတ်နိုင် သမျှ ကျွေးမွေး ထောက်ပံ့ခဲ့သည့် တိုင်းရင်းသား လက်နက်ကိုင် တော် လှန်ရေး အဖွဲ့အစည်းများအနက် ကေအင်ယူသည် ရှေ့တန်းမှ ပါဝင် ခဲ့သည်။

မိမိအနေဖြင့် ကျေးဇူးရှင် သဘွယ် သဘောထား သတ်မှတ်ခဲ့သည့် အဖွဲ့ အစည်းများ အနက်တွင် ကေအင်ယူသည် ထိပ်တွင် ရှိသည်။ ၁၉၉၉ မှ ၂၀၀၄ ခုနှစ် များ တ၀ိုက်တွင် အရှိန်အ၀ါ ကြီးမားခဲ့သည့် မြန်မာပြည် ဒီမိုကရက်တစ် မဟာမိတ် အဖွဲ့ချုပ်ကို ဦးဆောင် ခဲ့သော ဗိုလ်ချုပ်ကြီးမြ နှင့် တဖြေးဖြေးနှင့် အနီးကပ် ဆက်ဆံ မိရင်း ၄င်းသည် စစ် အစိုးရ အဆက်ဆက်က ၀ါဒဖြန့်ခဲ့သလို လူဆိုး လူမိုက်ကြီး တဦးမဟုတ်ဘဲ သူရသတ္တိ နှင့် ပြည့်စုံသည့် တော်လှန်ရေး သမားကြီး တဦး ဖြစ်မှန်း သိခဲ့သည်။ လေးစားချစ်ခင် ခဲ့သည်။ “ ကိုယ့်လူမျိုးကို ချစ်တယ် ဆိုတာ အခြားလူမျိုးကို မုန်းဘို့ မဟုတ်ဘူး ” ဟူသည့် ၄င်း၏ ရိုးရှင်းသော လူမျိုးရေး အမြင် ဆိုင်ရာသင်ကြားချက်ကို အမှတ်ရ နေဆဲဖြစ်သည်။

အလားတူပင် ၁၉၈၉ ခုနှစ် နောက်ပိုင်းမှ စ၍ ယနေ့အထိ ခေါင်းဆောင် လျှက် ရှိသော ကေအင်ယူ ခေါင်းဆောင်များ အပါ အ၀င် မိမိနှင့် ဆက်ဆံ ထိတွေ့မိသမျှ များမှာ တနည်းမဟုတ် တနည်း လေးစား ချစ်ခင်ဘွယ် ကောင်းသူများဖြစ် ကြောင်း တွေ့ရသည်။ ကိုယ်ကျိုးစွန့် အနစ်နာခံ လျှက် ကရင်အမျိုးသား အရေး သာမက မြန်မာ အပါအ၀င် တိုင်းရင်းသား အားလုံး အတွက် ဖက်ဒရယ်ပြည်ထောင်စု တည်ဆောက်ရေး၊ စစ်မှန် သော ပြည်တွင်း ငြိမ်းချမ်းရေး  ရရှိရေး တို့ အတွက် စွမ်းစွမ်း တမန် တိုက်ပွဲဝင်လျှက်ရှိသူများ ဖြစ်ကြောင်း တောက်လျှောက် လေ့လာခွင့် ရခဲ့သည်။ ယခု ဤ အစည်းအရုံးကြီးမှာ အကွဲ အပြဲဖြစ်တော့ မည်လား ဟူသည့် စိုးရိမ်မှုသည် အခြားသူများထက် မလျော့နည်းဘဲ ခံစား မိလာ သည်။ ဒေါက်တာ စင်သီယာမောင် ကဲ့သို့ နိုင်ငံရေး လုပ်ငန်းများနှင့် မစွက်ဘက်ဘဲ ဆေးပညာသန့်သန့် ဖြင့် လူထု အကျိုးပြု လုပ်ငန်း လုပ်နေသူ ကပင်လျှင် စိုး၇ိမ်ပူပန်ကြောင်း ထုတ်ဖေါ်ချက်ကို လေ့လာ နိုင်ပါသည်။

ကေအင်ယူ၏ လက်ရှိ ဥက္ကဌဖြစ်သူ စောတာမလာဘောမှာ အသက် ကိုးဆယ် အတွင်း ရောက်လာခဲ့ပြီး မြန်မာနိုင်ငံ သမိုင်း၏ တစိပ်တပိုင်း အဖြစ် လည်း ကောင်း၊ ကရင်အမျိုးသား အစည်းအရုံး သမိုင်းတွင် အဓိ ကျသော နေရာ များမှ လည်းကောင်း ပါဝင် ခဲ့သူဖြစ်သည်။ တိုင်းရင်းသား တော်လှန်ရေး သမိုင်းတွင် ရှားပါး ပစ္စည်းဟု ပြောနိုင်သည်။ အိုကြီး အိုမ ရောက်လာသည့် အချိန် အထိ စိတ်ဓါတ်၊ ဇွဲ၊ အားမန် တချက်မျှ မလျှော့ ဘဲ အဖွဲ့အစည်းကို ဆက်လက် ဦးဆောင် မှုပေး လျှက် ရှိသည်။ ရုပ်ခန္ဓာ ကိုယ်အရ မစွမ်း သန်တော့သော်လည်း နိုင်ငံရေးအမြင်များ ကျယ်ပြန့်ပြီး ကောင်းမွန် ဖြောင့်မတ်စွာ စဉ်းစား နိုင်သူလည်း ဖြစ်သည်။ ဥက္ကဌကြီး စောတာမလာဘော တရက်တာမျှ ဆက်လက် အသက်ရှည် ကျမ္မာလျှင် ကရင်အမျိုးသားများ အတွက် သာမက ပြည်ထောင်စု တခုလုံးအတွက်ပါ တရက်ပိုပြီး အကျိုးရှိသည်ဟု စာရေးသူ ခံယူ ပါသည်။

အထုတ်ခံလိုက်ရပြီဟု သတင်းထွက်လာသော ဗိုလ်ချုပ်ကြီး မူတူးဆေးဖိုး မှာလည်း ယခုလက်ရှိ ကေအင်ယူ ခေါင်း ဆောင် များ အတွင်း ဥက္ကဌကြီး စောတာမလာဘောပြီးလျှင် အသက်အကြီးဆုံးဟု ပြောရပါမည်။ အသက် ရှစ်ဆယ်မျှ ရှိနေပါပြီ။ နှစ်ပေါင်း ခြောက်ဆယ်ခန့်မျှ တော်လှန်ရေး အတွက် ပေးဆပ် လာခဲ့ ရသူဖြစ်သည်။ ကိုယ်ကျင့်တရား နှင့် စာရိတ္တ ကောင်းမွန်၊ အနေအထိုင် ရိုးရှင်း၊ အသောက်အစား ကင်းရှင်းပြီး စိတ် ထား နှိမ့်ချသူဖြစ်သည်။
ယခုအသက် အရွယ်ရောက်သည် အထိ ကျမ္မာရေးကို ဒေါင်ဒေါင်မြည် အောင် ထိမ်းထားနိုင်ကာ အောက်ခြေတပ်ထုများ အကြားသို့  ခြေလျှင် ခရီး အကြိမ် ပေါင်းများစွာ ဆင်းပြီး အနီးကပ် ကွပ်ကဲ အုပ်ချုပ်မှု ပေးနိုင် သူဖြစ်သည်။

ယခု ဤခေါင်းဆောင်ကြီးများ အတွင်း မည်သို့ ဖြစ်သွားခဲ့ကြပြီနည်း။ ကေအင်ယူ ခေါင်းဆောင်များ ညံ့ဖျင်း၍ ဤသို့ ဖြစ်ရသည်ဟု အလွယ် တကူ ကောက်ချက် မချသင့်ပါ။ ဤဖြစ်ရပ်ကို နားလည်နိုင်ရေးအတွက် မြန်မာနိုင်ငံ၏ နိုင်ငံရေး နောက်ခံ အကျဉ်းကို ပြန်လည် မိတ်ဆက်တင်ပြ ပါမည်။

ကရင်အမျိုးသားများ အပါအ၀င် တိုင်းရင်းသားတွေ ဘာကြောင့် ခုခံစစ် ကို ဆင်နွှဲနေကြရသလဲ။

ကိုမင်းကိုနိုင် ကချင်ပြည်နယ်အတွင်း လေ့လာရေး ခရီးစဉ်မှ ပြန်လာ ပြီးနောက် “ အမြှောက်ဆန်တလုံးကို ကျပ်သိန်းသုံး ဆယ် လောက် တန်တာတွေနဲ့တဘက်နဲ့တဘက် ပစ်နေကြသဗျာ။ အဲသည် ငွေတွေကို လူထု ကျမ္မာရေး အတွက် ဆေးပေးခန်းတွေ ဖွင့်တာ၊ လူထုပညာရေး အတွက် စာသင်ကျောင်းဆောက်တာ တွေမှာ သုံးရင် ဘယ်လောက် ကောင်းမလဲ” ဟု မှတ်ချက်ပြုခဲ့ဘူးပါသည်။
ကိစ္စရပ်တိုင်းတွင် အကြောင်းနှင့် အကျိုး (Cause and Effect)  ဟူ၍ ရှိသည်။ အကျိုးအရ ပြောလျှင် ကိုမင်းကိုနိုင်၏ မှတ်ချက်မှာ သွေးထွက် အောင် မှန်ပါသည်။ သာမန်အားဖြင့်ကြည့်လျှင် ငွေတွေကို အလွယ်တကူ
ဖြုန်းနေကြသည်ဟု မြင်နိုင်သည်။ သို့ရာတွင် အကြောင်းရင်းကို စစ်ကြောဘို့ လိုပါမည်။ ဘာကြောင့် တိုင်းရင်းသားတွေ က ဤသို့ခုခံစစ် ဆင်နွဲနေရသည်၊ ဘက်နှစ်ဘက် ဖြစ်ပွားနေကြသော ဤစစ်ပွဲတွင် မည်သည့်ဘက် ၌ တာဝန်ရှိသည် စသည်တို့ကို လေ့လာဘို့ လိုပါမည်။

ပြည်ထောင်စု တည်ဆောက်ရာတွင် တိုင်းရင်းသားလူမျိုးများအတွင်း တန်းတူ ခံစားခွင့်ရရှိရေး နှင့် စပ်လျှဉ်း၍ ဗိုလ်ချုပ် အောင်ဆန်းက “ ကရင်တကျပ် မြန်မာတကျပ် ” ဟူ၍ သုံးနုန်း သွားခဲ့ဘူးသည်။ နှစ်ပေါင်း ခြောက်ဆယ်ကျော် ခဲ့ပြီဖြစ် သော်လည်း ဤစံထားသည့် အသုံးအနုန်း လက်တွေ့ဖြစ်လာရေးမှာ အိပ်မက် အဆင့်ထက် မပိုသေးပါ။ တိုင်းရင်း သား လူမျိုးစုများသည် ၄င်းတို့ရသင့်သည့် စုပေါင်း အခွင့်အရေးဖြစ် သော “ တန်းတူရေးနှင့် ကိုယ်ပိုင်ပြဌာန်းခွင့် ” အတွက် ခုခံစစ်ဆင်နွှဲနေ ကြရခြင်းဖြစ်သည်။ “ ခွဲထွက်ပြီး သီးခြားနိုင်ငံ” များ တည်ထောင်ရန် တိုက်ပွဲဝင်နေကြခြင်း မဟုတ်ပါ။ “ တန်းတူရေးနှင့်  ကိုယ်ပိုင်ပြဌာန်းခွင့် ” မရမချင်းတော့ ၄င်းတို့၏ နိုင်ငံရေးအသံ ကို တပြည်ထောင်လုံး ကြားသိ စေမည့် ခုခံစစ်ကို ရပ်ကြမည် မဟုတ်ပါ။

အောက်တိုဘာလ ခုနှစ်ရက်နေ့တွင် ဒီမိုကရက်တစ်မြန်မာ့အသံ ရုပ်မြင် သံကြား အစီအစဉ်မှ မွန်၊ ရခိုင်၊ ချင်း အမျိုး သား လွှတ်တော် ကိုယ်စား လှယ် သုံးဦးနှင့် အင်တာဗျူးကို ထုတ်လွှင့်သွားခဲ့သည်။ ၄င်းတို့က ထိမ်းထိမ်းသိမ်းသိမ်း ပြောသွားခဲ့သော်လည်း ၂၀၀၈ ခုနှစ် ဖွဲ့စည်းပုံ အခြေခံဥပဒေ အောက်တွင် တိုင်းရင်းသား တော်လှန်ရေး အဖွဲ့အစည်း များ လိုလားမြှော်မှန်းသည့် “ တန်းတူရေးနှင့် ကိုယ်ပိုင်ပြဌာန်းခွင့် ” မရနိုင် ကြောင်း ရှင်းရှင်း ကြီးပေါ်နေပါသည်။ တိုင်းရင်းသားတွေက သူတို့ပြည်နယ်မှာ သူတို့နေ နေကြပါသည်။ စာရေးသူကဲ့သို့ လူများစု “မြန်မာ ” လူမျိုးအများစုကြီး နေထိုင်သည့် နိုင်ငံအလယ်ပိုင်း မြေပြန့် ဒေသကြီး၏ “ နေပြည်တော် ” ကို သွားရောက်ထိုးစစ်ဆင် တိုက်ခိုက်နေ ခြင်း မဟုတ်ပါ။ သို့ဖြစ်၍ စစ်ပွဲတွေ မဆင်နွှဲပါနှင့်တော့၊ ရပ်ပါ ဟု မည်သူ့ကို ဖိအားပေးရမည်နည်း။ “ နေပြည်တော် ” ကို ဗဟိုပြုပြီး ရွှေနန်းတော်ကြီး ဖြစ်လာအောင် တထီးတနန်း တည်ဆောက်နေသည့် စစ်ခေါင်းဆောင်များကိုသာ ပြောရမည် ဖြစ်သည်။

အမေရိကန်ဒေါ်လာ သန်းထောင်ဂဏန်း တချို့ကို အသုံးပြု၍ နေပြည် တော်ကြီး တည်ဆောက်သော ငွေမှာ စစ်ခေါင်းဆောင်များ ချွေးနည်း စာဖြင့် ရှာဖွေ ရရှိထားသော ငွေမဟုတ်ပါ။ တိုင်းရင်းသား ဒေသများမှ အဓိကအားဖြင့် ထွက်ရှိ သည့် သဘာဝသယံဇာတ ပစ္စည်းများအား ရောင်းချ၍ ရရှိ ငွေနှင့် တည်ဆောက် ထားခြင်းဖြစ်သည်။ ပြည်ထောင်စု အတွက် မြို့တော် ရန်ကုန်ရှိပါလျှက် မလိုအပ်ဘဲ “နေပြည်တော်” တည် ဆောက်မည့် ငွေများအား တပြည်လုံး လူထု ကျမ္မာရေး၊ ပညာရေး လုပ်ငန်းများတွင် သုံးမည်ဆိုပါက မည်မျှ အကျိုးရှိနိုင်မည်မှာ ရှင်းနေ သည်။ မြန်မာလူမျိုးအများစု  အခြေပြုသည့်နေရာတွင် တည်ဆောက် သည့် မြို့သစ် “နေပြည်တော်” နှင့် ကရင်ပြည်နယ်၏ မြို့တော် ဖါးအံကို နိုင်းယှဉ်ကြည့်ပါ။ အဆ တထောင်နှင့် တဆမျှ မက ကွားခြားနေပါသည်။ “ ကရင်တကျပ် မြန်မာတကျပ် ” မူ၏ လက် တွေ့သည် အဘယ်မှာနည်း။ ယင်းသို့ဖြစ်နေသမျှ တိုင်းရင်းသားများ၏  ခုခံစစ်ကို ရပ်ကြပါဟု မည်သို့ ပြောရက်နိုင် မည်နည်း။

ပြည်တွင်း ငြိမ်းချမ်းရေး တည်ဆောက် စေလိုလျှင် တိုင်းရင်းသား ဒေသ များသို့ စစ်ပွဲများ သွားရောက်ဆင်နွှဲနေမည့်အစား တိုင်းရင်းသားများ တောင်းဆို နေကြသည့် “ တန်းတူရေးနှင့် ကိုယ်ပိုင်ပြဌာန်းခွင့် ” ပေးအပ်နိုင်ရေးအတွက်၂၀၀၈ ခုနှစ် ဖွဲ့စည်းပုံကို ပြင်လိုက်ပါ ဟု သာ နေပြည် တော်ရှိ စစ်ခေါင်းဆောင် များကို ဖိအား ပေးရမည်ဖြစ်သည်။ တိုင်းရင်းသား များအတွက် စုပေါင်း အခွင့်အရေးဖြစ်သော “တန်းတူရေး နှင့် ကိုယ်ပိုင်ပြဌာန်းခွင့် ”၊ နိုင်ငံသားများ၏ တဦးချင်း အခွင့် အရေးဖြစ် သော နိုင်ငံရေး လွတ်လပ်ခွင့်များ ရရှိပါက စစ်ပွဲများ ရပ်သွားမည် မုချဖြစ် သည်။

သို့မဟုတ်လျှင် ပြည်တွင်းစစ်ကို ငြိမ်းသတ်နိုင်ရေးအတွက် ဗမာပြည် ကွန်မြူနစ်ပါတီက တင်စား သုံးနုန်းသွားသကဲ့သို့  “ ငြိမ်းမရသည့် မီးတောက်မီးလျှံ ” သာ ဖြစ်နေပါဦး မည်။ ကရင် အမျိုးသား အစည်းအရုံး သည် မြန်မာနိုင်ငံ လွတ်လပ် ရေး ရပြီးချိန်မှ စ၍ ယနေ့အထိ ခုခံစစ်ကို တောက်လျှောက်ဆင်နွှဲ လျှက်ရှိသည်။ အခက်အခဲမည်မျှ ကြီးမားမည်ကို မှန်းဆနိုင်ပါသည်။ ဤနောက်ခံမှ စတင်၍ ကရင် အမျိုးသား အစည်း အရုံး၏ စည်းရုံးရေး ပြသနာကို  ချည်းကပ်မှသာ သိမြင်မှု ရှင်းလင်း နိုင်ပါ မည်။

စစ်အစိုးရ၏ အပစ်အခတ်ရပ်စဲရေး မဟာဗျူဟာကို ကျော်လွှားနိုင်ရန် ကြိုးပမ်းခြင်း

၁၉၈၈ ခုနှစ် ရှစ်လေးလုံး အရေးတော်ပုံကြီး ဖြစ်ပွားနေသည့် အချိန်အထိ စစ်အာဏာရှင်စနစ်ကို စစ်ရေးအရ ထိထိ ရောက်ရောက် တုန့်ပြန် နိုင်ခဲ့ သည်မှာ မြန်မာနိုင်ငံ အရှေ့မြောက်ပိုင်းတွင် လွတ်မြောက် ဒေသ တည်ထောင် ခဲ့သည့် ဗမာ ပြည်ကွန်မြူနစ် ပါတီဖြစ်သည်။ ရှစ်လေးလုံး ပြီးသည့် အချိန်တွင် အဆိုပါ လွတ်မြောက် ဒေသသည် ကြီးထွား ကြံ့ခိုင် ဆဲဖြစ်သည်။ ၁၉၈၉ ခုနှစ်တွင် ဗမာပြည် ကွန်မြူနစ် ပါတီအား ၀ တပ်များ က အာဏာသိမ်းကာ မောင်းထုတ်ခဲ့ပြီး နောက် စစ်အစိုးရသည် အခွင့် ကောင်းယူကာ ၀ပြည် သွေးစည်းရေး ပါတီ (၀သပ) နှင့် အပစ်အခတ် ရပ်စဲရေး လုပ်ခဲ့ သည်။ ဗမာပြည် ကွန်မြူနစ်ပါတီ အားကောင်းစဉ်က တောင်းဆိုခဲ့သည့် ပါတီ၊ ပြည်သူ့တပ်မတော်နှင့် လွတ်မြောက်ဒေသ အား အသိအမှတ်ပြုရေး ဆိုသည်များ အား စစ်အစိုးရက လက်မခံခဲ့။ ၀သပ ကို မူ အဆိုပါ အချက်သုံးချက်စလုံးအား ပေးအပ် ကာ အပစ်ရပ် စေလိုက်သည်။ ထို့နောက်အရှေ့မြောက်ဒေသတွင် ကွန်မြူနစ်ပါတီ နှင့်ဆိုင်ထားခဲ့သည့် တပ်များအနက် တပ်ရင်း အတော်များများ ကို ရှမ်း ပြည်မှ ထုတ်နုတ်ကာ ကရင်ပြည်နယ်အတွင်းသို့ ပို့လွှတ်၍ ကေအင်ယူ အမျိုးသား အစည်းအရုံး နှင့် တပ်ပေါင်းစုက ဦးဆောင် တည်ထောင်ထား ခဲ့သည့် မာနယ်ပလော လွတ်မြောက်နယ်မြေကို ထိုးစစ် ကြီးများ ဆင်နွှဲပါ တော့သည်။

လက်နက်ကိုင် တော်လှန်ရေး ဆင်နွှဲ နေကြ သော်လည်း တော်လှန်ရေး အဖွဲ့အစည်း များသည် စစ်လိုလားသူများ မဟုတ် ပြည်တွင်း ငြိမ်းချမ်း ရေးကို  နိုင်ငံရေး နည်းလမ်းဖြင့် တည်ဆောက် လိုကြသည်။ မာနယ် ပလောကို ခုခံကာကွယ်သည့် ထိုး စစ်ကြီးများအား ရင်ဆိုင်ရင်း မြန်မာ ပြည် ဒီမိုကရက်တစ် မဟာမိတ် အဖွဲ့ချုပ် သည် အတုအယောင် အပစ် အခတ်ရပ်စဲ ရေးကို ကျော်လွှားပြီး စစ်မှန်သည့် ပြည်တွင်း ငြိမ်းချမ်းရေး တည်ဆောက်နိုင်ရန် ၁၉၉၀ ခုနှစ်တွင် (တဖွဲ့ချင်းမဟုတ်ဘဲ) တပ်ပေါင်း စုနှင့် တွေ့ဆုံ ဆွေးနွေးရေး မူကို ချမှတ်ခဲ့သည်။ တဖွဲ့ခြင်း ခွဲထုတ် စည်းရုံးသွားမည့် အန္တရယ်ကို ကာကွယ်ရန် ဖြစ်သည်။ ဤမူအပေါ်တွင် တော်လှန်ရေး အဖွဲ့အစည်းများသည် ကာလ အတန်ကြာမျှ တောင့်ခံ ရပ်တည် နိုင်ခဲ့ကြ သည်။

ဝသပ အပစ်ရပ် သွားခဲ့သော်လည်း ကျန်သည့် တိုင်းရင်းသား လက် နက်ကိုင် တော်လှန်ရေး အဖွဲ့အစည်းကြီးငယ်များ အားလုံး နီးပါးမှာ မာနယ်ပလောကို အခြေပြုနေသည့် အမျိုးသား ဒီမိုကရေစီ တပ်ပေါင်းစု နှင့် မြန်မာပြည် ဒီမိုကရက်တစ် မဟာမိတ် အဖွဲ့ချုပ် တို့၏ ဦးဆောင်မှု အောက်တွင် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ကျောင်းသားတပ်မတော်) က ကျောရိုးတရပ်အဖြစ်ပါဝင်လျှက် လွတ်မြောက်နယ်မြေကို ခုခံကာကွယ်သည့် စစ်ပွဲကြီးများအား အောင်မြင် စွာ ဆင်နွှဲနိုင်ခဲ့ကြသည်။ မာနယ်ပလော တပ်ပေါင်းစု၏ တော်လှန်ရေး အလံ တလူလူလွှင့်ထူနိုင်ခဲ့ သည်။ ၁၉၉၂ ခုနှစ်တွင် စစ်အစိုးရ၏ အရှေ့တောင်တိုင်း စစ်ဌာနချုပ် တိုင်းမှုး ဗိုလ်ချုပ်မောင်လှ က တဘက် သတ် အပစ်အခတ် ရပ်စဲရေး ကြေငြာခဲ့ရသည်။ ဤသည်မှာ ငြင်း၍မရ သော သမိုင်းဖြစ်သည်။

စစ်အစိုးရသည် စစ်ရေးဖြင့် ထိုး၍မရသောအခါ နိုင်ငံရေးလှည့်ဖြားမှုကို အရှိန်မြှင့်ပြီး ချော့မြူလာပြန်သည်။ တဘက် တွင်လည်း ကြောင်ဖြူ တာ မဲတာက အဓိက မဟုတ်၊ ကြွက်သေဘို့ က အဓိက ဖြစ်တယ် ဟူသော ဥပမာအောက်တွင် တရုပ်ပြည်၏ စီးပွား ရေး တိုးတက်ဖွံ့ဖြိုးမှုကိုသာ ဇောင်းပေး ဖေါ်ဆောင် လိုသည့် တရုတ်ခေါင်းဆောင်ကြီး တိန့်ရှောင် ဖိန် တံခိုးထွားလာခဲ့ပြီး နောက် တရုတ်ပြည်သည် မြန်မာနိုင်ငံအား ကုန်သွယ် မှုနှင့် စီးပွားရေးရင်းနှီးမြှုပ်နှံမှု များတွင်သာ စိတ်ဝင်စားမှုပိုလာခဲ့သည်။ စစ်ပွဲများကို မမြင်လိုတော့။ တရုတ်မြန်မာနယ်စပ် အခြေစိုက် လက်နက် ကိုင် အဖွဲ့အစည်း များအပေါ် ဖိအား များလည်း ကျရောက် လာပုံ ရှိသည်။ ဤအခြေအနေ နောက်ခံများ အောက်တွင် မြန်မာပြည် ဒီမို ကရက် တပ်မဟာမိတ် အဖွဲ့ချုပ်အတွင်း ဒုတိယ အင်အား အကြီးဆုံးဟု ပြောနိုင်သည့် ကချင် အမျိုးသား အစည်းအရုံး (ကေအိုင်အို က စစ်အစိုးရ နှင့် အပစ်အခတ် ရပ်စဲရေး လုပ်သွားသောအခါ တပ်ပေါင်းစု အင်အား ချည့်နဲ့သွားခဲ့ ရသည်။

ကေအင်ယူအတွင်းရှိ ကရင် ဗုဒ္ဓဘာသာဝင် ရဲဘော်၊ တပ်မှုးအချို့၏ ဘာသာရေး အခြေခံ မကြေနပ်မှုကို စစ်ထောက်လှန်း ရေးက အသုံးချ၍ ဒီကေဘီအေ ပေါ်ပေါက်လာအောင် လုပ်ဆောင် ပေးလိုက်နိုင်ပြီးနောက် မာနယ်ပလောကို အသက် ပေး ခုခံ ကာကွယ်ခဲ့ကြသော ကရင်ရဲဘော် အချို့ကိုယ်တိုင် လမ်းပြ ခေါ်ဆောင်လာမှုဖြင့် ၁၉၉၄ ခုနှစ် နှစ်ကုန်ပြီး နောက် တွင် စစ်အစိုးရ လက်တွင်းသို့ သက်ဆင်းသွား ခဲ့ရပါတော့သည်။ သို့ရာတွင် ကရင် အမျိုးသား အစည်းအရုံးသည် ကျဆုံး မသွားဘဲ ခံစစ် သေ ဆင်နွှဲသည့် အနေအထားမှ ပျောက်ကြားစစ် မဟာဗျူဟာကို ပိုမို ဇောင်းပေး ကျင့်သုံးရင်း ခုခံစစ် ကို ဆက်လက် ဆင်နွှဲပြီး ကြံ့ခိုင်စွာ ရပ် တည် လာနိုင်ခဲ့သည်မှာ ယနေ့တိုင်ဖြစ်သည်။

တချိန်တည်းတွင် ကရင် အမျိုးသား အစည်းအရုံး လက်ရှိ ရင်ဆိုင်နေရ သော စည်းရုံးရေးပြသနာကို တပြည်လုံးပြည်တွင်း စစ်နောက်ခံ၊ စစ် အစိုးရ အဆက်ဆက်၏ ခွဲခြား ဖဲ့ထုတ် လွှမ်းမိုးရေးမူ၊ အခြားသော တိုင်း ရင်းသား လက်နက်ကိုင် တော်လှန်ရေး အဖွဲ့အစည်းများ၏ ရပ်တည်မှု၊ ပြည်တွင်း လူထု၏ ဖိအား စသည်များနှင့် ဆက်စပ် စဉ်းစားမှသာ ရုပ်လုံး ပေါ်နိုင်မည် ဖြစ်ကြောင်း တင်ပြလိုခြင်း ဖြစ်သည်။

……………………………………………..

ကေအင်ယူ၏ အလုပ်အမှုဆောင် အဖွဲ့ဝင်များ ဖြစ်ကြသော ဗိုလ်ချုပ်ကြီး မူတူးဆေးဖိုး၊ စောဒေးဗစ်ထော နှင့် ဗိုလ်မှုး ရောဂျာ တို့အား  တာဝန်များ မှ ထုတ်ပယ် လိုက်ခြင်းမှာ ကေအင်ယူ အတွင်း ဖြစ်ပွားနေသည့် ပြသနာ ဟု သာမန်အားဖြင့် နားလည်နိုင်ပါမည်။ သို့ရာတွင် ကေအင်ယူ ကိုယ် တိုင်က တပြည်လုံးသိ၊ တကမ္ဘာလုံး သိအောင် ထုတ်ပြန် ဆောင်ရွက် နေပြီဖြစ်သဖြင့် ဤကိစ္စမှာ အဖွဲ့အစည်း တခု အတွင်း လျှို့ ၀ှက်ချက် မဟုတ်တော့ပါ။
၎င်းတို့အား အရေးယူ လိုက်သည့် အဓိက အကြောင်းခံမှာ ဦးသိန်းစိန် ခေါင်းဆောင်သည့် လက်ရှိ စစ်အစိုးရက ဖေါ်ဆောင်လျှက် ရှိသော အပစ်အခတ် ရပ်စဲရေး နှင့် လုံးဝ ဆက်စပ်လျှက် ရှိသောကြောင့် ပြည် တွင်း ငြိမ်းချမ်းရေးကို လိုလား မြတ်နိုးသော လူထု တရပ်လုံး အနေဖြင့် လည်း လေ့လာခွင့် ပါဝင်ဆွေးနွေးခွင့် သဘောထား အမြင်ထုတ်ဖေါ်ခွင့် ရှိသည် ဟု ယူဆပါသည်။ ကေအင်ယူ အလုပ် အမှုဆောင် အဖွဲ့အနေ ဖြင့်လည်း ကေအင်ယူ ပါတီဝင် အားလုံးနှင့် တပ်မှုး၊ တပ်သား အောက် ခြေ ထုများသာမက ကရင် လူထုများကိုပါ ချပြ၊ သဘောထား
အမြင်များကို စုဆောင်း လေ့လာကာ ဆက် လက်ဆောင်ရွက်မည် ဆိုလျှင် စနစ်ဟောင်းကို ဆန့်ကျင်၍ စနစ်သစ်ကို တည်ဆောက်မည့် တော်လှန်ရေး အဖွဲ့ အစည်း တခုအဖြစ် ပို၍ ခိုင်မာသွားနိုင်ပါမည်။

စာရေးသူ အနေဖြင့် ဤကိစ္စတွင် အလယ်၌ တည့်တည့် ရပ်၍ သုံးသပ် တင်ပြ သွားမည် ဖြစ်ကြောင်း အထူးသဖြင့် ကရင် လူထုကို အသိပေး လိုပါသည်။ အဘယ်ကြောင့် တည့်တည့် ရပ်သည်ဟု သုံးနုံးပါသနည်း။ ဤသည်ကို ရှင်းပါမည်။

ဦးဆောင် အရေးယူ လိုက်သည့် ကေအင်ယူ အလုပ် အမှုဆောင် အဖွဲ့၏ အမြင့်ဆုံး ခေါင်းဆောင် ငါးဦးအနက် လေးဦး နှင့်လည်းကောင်း၊ အရေး ယူ ခံလိုက်ရသည့် ခေါင်းဆောင် သုံးဦး နှင့် လည်းကောင်း စာရေးသူ သည် ပုဂ္ဂိုလ်အရ ရင်းနှီး ပါသည်။လုပ်ငန်းအရလည်း ဆက်စပ် လုပ်ကိုင် ခဲ့ဘူးများ ဖြစ်ကြသည်။
ကေအင်ယူ လက်ရှိ ဥက္ကဌကြီး စောတာမလာဘော မှာ ကေအင်ယူ ပါဝင် ဖွဲ့စည်း ထားသည့် နိုင်ငံရေး တပ်ပေါင်းစု ဖြစ်သော ပြည်ထောင်စု မြန်မာ နိုင်ငံ အမျိုးသား၏ ကောင်စီ၏ ဥက္ကဌ တာဝန်ကို ထမ်းဆောင် သောအခါ စာရေးသူအား (အခြား အဖွဲ့အစည်းခေါင်းဆောင်များ ၏ သဘော တူညီ မှုများ ပါရယူ၍) အကြံပေး အဖြစ် ၄င်းကိုယ်တိုင် စာနှင့် လက်မှတ် ရေး ထိုး အသိအမှတ်ပြုကာ မိမိ အကူအညီကို ရယူခဲ့ဘူးပါသည်။ ပထမတွင် ဥပဒေ အကြံပေး ဖြစ်သော်လည်း နောက်ပိုင်း ၌ နိုင်ငံရေး ကိစ္စများပါ ပါဝင်စေ လျှက် အကြံပေးနိုင်စေရန်ဟု ဆိုကာ ရှေ့က ဥပဒေ ဆိုသော စကားလုံးကို ဖြုတ်ခဲ့ပါသည်။ ကေအင်ယူ ဥက္ကဌကြီး သည် ယနေ့တိုင် မိမိအပေါ် တစုံတရာ ယုံကြည်မှု ရှိနေဆဲဟု မြှော်လင့်ပါ သည်။

အရေးယူ ခံလိုက်ရသည့် ဗိုလ်ချုပ်ကြီး မူတူးဆေးဖေါမှာ ၄င်းတည်းခို နေထိုင်သည့် အိမ်တွင် အကြောင်း တခုခုဖြင့် အဖွဲ့ အစည်း ခေါင်း ဆောင်များအား ဖိတ်ကြား ဧည့်ခံလေ့ ရှိသော အခါများတွင် မိမိကိုပါ ဖိတ်လေ့ ရှိသည်။ လူခြင်းတွေ့ သည့် အခါများ၌ မိမိ၏ ရေဒီယို အင်တာ ဗျူး များကို နှစ်ခြိုက် သဘောကျကြောင်းနှင့်ပြောကာ အသိအမှတ်ပြုလေ့ ရှိသူဖြစ် သည်။ ဥပဒေပညာကိုလည်း တန်ဘိုး ထားသူလည်း ဖြစ်သည်။ ၄င်းအပေါ် အရေးယူ လိုက်သည့် ကိစ္စ နှင့် စပ်လျှဉ်း၍ အများအတွက် အလုပ်လုပ်ခြင်းသာ ဖြစ်သဖြင့် တာဝန်ပေး အပ်လျှင်လည်းလုပ်၊ မပေး လျှင်လည်း မလုပ်ရုံ သာ ရှိ ကြောင်း ပြောသည်ဟု တဆင့် စကားကြား သိရသည်။ ထို့အပြင် ၄င်း နှင့် တွေ့ဆုံခဲ့သည့် ခရိုင်ဥက္ကဌ တဦးက ဗိုလ်ချုပ် ကြီး မူတူးဆေးဖိုးက အာဃာတ မထားကြောင်း အောက်တို ဘာလ (၈) ရက်နေ့ည ဘီဘီစီ သတင်းတွင် ထုတ်လွှင့်သွား ခဲ့သည်ကို ကြားရသဖြင့် စာရေးသူ အနေဖြင့် ၄င်းအပေါ်များစွာ ဂရုဏာ သက်မိ သည်။

စောဒေးဗစ်ထော နှင့် အစည်းအဝေး ပေါင်းများစွာ အတူ တက်ခဲ့ဘူး သည့် အပြင် ကေအင်ယူ ကိုယ်စားလှယ်အဖြစ် ဥရောပ ခရီးထွက်စဉ် ထွက်သည့်အခါ ဆွီဒင်နိုင်ငံရှိ မိမိနေအိမ်သို့ လာရောက် လည်ပတ် ခဲ့သူဖြစ်သည်။ ဗိုလ်မှုးရော ဂျာနှင့် အရင်းနှီးဆုံးဟု ပြောရပါမည်။ မာနယ်ပလော လွတ်မြောက် နယ်မြေရှိစဉ် နှစ်တချို့ မိမိအခြေချ လှုပ်ရှားခဲ့ရာ၌ အိမ်နီးခြင်း သဘွယ် နေခဲ့ပြီး အကြောင်းကြောင်းနှင့် အနည်းဆုံး တလ တကြိမ်ခန့်မျှ တဦးနှင့် တဦးတွေ့ဆုံခဲ့ ကြသည်။

ဤအကြောင်းများကို ဖေါ်ထုတ် တင်ပြနေခြင်းမှာ ကြွားဝါလို၍ မဟုတ်ပါ။ စစ်ဦးစီးချုပ် ဗိုလ်ချုပ်ကြီး တဦးကို အရေးယူပြီး တာဝန်မှ ထုတ်ပယ် လိုက်သည် ဟူသည့် ဖြစ်ရပ်မှာ (မိမိသိသမျှ) နှစ်ခြောက်ဆယ် ကျော်ကြာ ကေအင်ယူ သမိုင်းတွင်  မရှိခဲ့ဘူးပါ။ သို့ဖြစ်၍ လက်ရှိ အချိန်သည် ကေအင်ယူအတွက် နိုင်ငံရေးအရ အရေးကြီး လာသည့်အချိန်ဖြစ်သည်။
ကေအင်ယူ၏ တိုးတက်မှု၊ ဆုတ် ယုတ်မှု အနေအထားများသည် ကေအင်ယူနှင့် ဆက်စပ် လက်တွဲ ဆောင်ရွက်လျှက် ရှိသော တိုင်းရင်း သား လက်နက် ကိုင် အဖွဲ့အစည်းများ၊ ဒီမိုကရေစီ အင်အားစုများအပေါ် တနည်း မဟုတ် တနည်း ရိုက်ခတ်နိုင်သည့် အချိန်ဖြစ်သည်။ ဤ ရိုက် ခတ်မှု အကျိုးဆက်အနေဖြင့် တပြည်လုံးပြည်တွင်းငြိမ်းချမ်းရေး လှုပ်ရှား မှုကြီးကို အကောင်းဘက် သို့မဟုတ် အဆိုးဘက်သို့ တွန်းပို့ပေးနိုင်မည့် အချိန်ဖြစ်သည်။ အကွဲအပြဲများမဖြစ်အောင် ကေအင်ယူ အောက်ခြေ တပ်ထုများ၊ ကရင် လူထုများအနေဖြင့် မိမိတို့ခေါင်းဆောင်များအား မည်သို့ ၀ိုင်းရံ သင့်သည် ကို အလေးအနက် စဉ်းစားရန် လိုအပ် နေ သည့် အချိန်ဖြစ်သည်။ ဤသို့ အရေးကြီးလှသည့် အချိန်တွင် မိမိ၏ သုံးသပ် ချက်များသည် ချစ်ခြင်း မုန်းခြင်း ကင်းစွာ အရှိကို အရှိအတိုင်း၊ နိုင်ငံရေးစံ၊ အဖွဲ့အစည်း တည်ဆောက်မှုပေတန်၊ ဥပဒေ အခြေခံများဖြင့် သုံးသပ်ခြင်းသာ ဖြစ်ကြောင်း အမြင်ရှင်းစေလို၍ ဖြစ်သည်။

အဆင့်မြင့် ကေအင်ယူ ခေါင်းဆောင်သုံးဦးကို တာဝန်မှ ရပ်စဲရသည့် အကြောင်းရင်းခံများ ဟူ၍ မြန်မာလို ခေါင်းစဉ် တပ်ထားပြီး ကရင် ဘာသာနှင့် အသေးစိပ် ရှင်းလင်းချက် တစောင်အား သောသီးခိုး ကရင် သတင်းစဉ် ၀က်ဆိုက်တွင် မနေ့က (အောက်တိုဘာလ ၈ ရက်နေ့က) ဖတ်ရှုလိုက်ရသည်။ အဆိုပါ ရှင်းလင်းချက်ကို ကေအင်ယူ ဗဟိုကော် မတီမှ ထုတ်ပြန်ကြောင်း မပါရှိသော်လည်း ကေအင်ယူ ဗဟိုကော်မတီ မှသာ သိနိုင်သော အကြောင်းရပ် များဖြစ်နေ၍ ယင်း အပေါ် အခြေခံကာ သုံးသပ်တင်ပြပါမည်။

အဘယ်ကြောင့် အရေးယူရကြောင်း ရှင်းလင်းချက်များကို ခြုံကြည့်လျှင်

(၁) ကေအင်ယူ စစ်ဦးစီးချုပ်သည် ၄င်းအား အပ်နှင်းထားသည့် စစ်ရေး လုပ်ပိုင်ခွင့်များထက် ကျော်လွန်ဆောင်ရွက်ခဲ့ သည်။ အလုပ်အမှုဆောင် ကော်မတီ သို့မဟုတ် အမြင့်ဆုံး ခေါင်းဆောင် ငါးဦး၏ သဘော တူညီ ချက်ကို မတောင်းခံဘဲ အပစ်အခတ် ရပ်စဲရေး လက်မှတ် ရေးထိုး ခဲ့ သည်။ စီးပွားရေး လမ်းကြောင်းကို ညွှန်ကြားမှုများ ပြုခဲ့သည်။

(၂) စစ်ဦးစီး ချုပ်သည် အဖွဲ့အစည်း တည်ဆောက်မှု အရ အဆင့်ဆင့် ဦးဆောင်မှုကို လိုက်နာခြင်းမရှိ။ အပစ်အခတ်ရပ်စဲ ရေး လက်မှတ် ထိုးပြီး နောက်ပိုင်း အပစ်အခတ် ရပ်စဲရေးနှင့် ဆက်စပ် သည့် နိုင်ငံရေး လုပ်ငန်း များအား ကေအင်ယူ အလုပ် အမှုဆောင် အမြင့်ဆုံး ခေါင်းဆောင် ငါးဦး သို့ တင်ပြ၍ ခွင့်ပြုချက် တောင်းခံခြင်းမရှိဘဲ ဆောင်ရွက်ခဲ့သည်။ အလုပ်အမှုဆောင် အဖွဲ့သို့ တရားဝင် တင်ပြခြင်း မရှိဘဲ စစ်ဦးစီးချုပ်မှ ဦးဆောင်ကာ လျှို့ဝှက် သဘောဆောင်သည့် အစည်းအဝေးများ ကျင်းပ ခဲ့သည်။စောဒေးဗစ်ထော၊ ဗိုလ်မှုးရော်ဂျာ တို့ဖြင့်သာ သုံးဦး အုပ်စုဖွဲ့၍ ဆောင်ရွက် ခဲ့သည်။

(၃) အဖွဲ့အစည်း တည်ဆောက်မှု စည်းမျဉ်း စည်းကမ်းများကို လိုက်နာ ခြင်းမရှိ။ အလုပ်အမှုဆောင် အဖွဲ့အစည်းအဝေး တက် ရောက်လာသည့် အခါတွင်လည်း လုပ်ငန်းစဉ်များကို ရှင်းရှင်းလင်းလင်း တင်ပြခြင်းမရှိ။ စောဒေးဗစ်ထောသည် အလုပ် အမှုဆောင် အဖွဲ့အစည်း အဝေးများကို အကြောင်း ခိုင်လုံစွာ တင်ပြခြင်း မရှိဘဲ သို့မဟုတ်ကျမ္မာရေး အကြောင်း ပြ၍ ပျက်ကွက်သော်လည်း ထိုအချိန်တွင် (စစ်အစိုးရနှင့်) ဆက်ဆန်ရေး ရုံးဖွင့်ပွဲ များကိုမူ တက်ရောက်ခဲ့သည်။

(၄) နိုင်ငံရေးအရ ကေအင်ယူမှ ချမှတ်ထားသော နိုင်ငံရေး လုပ်ငန်းစဉ်၊ ရပ်တည်မှု များနှင့် ဆန့်ကျင်ဆောင်ရွက်နေကြသဖြင့် အဖွဲ့အစည်း အပေါ် တာဝန်ခံမှုမရှိ။

အချက် (၁) မှ စတင်၍ သုံးသပ်ပါမည်။

အချက် (၁) မှာ နိုင်ငံရေး နှင့် စစ်ရေး ဆက်စပ်မှု၊ တာဝန်ခွဲခြား ထမ်း ဆောင်မှု များနှင့်သက်ဆိုင်သည်။ အဖွဲ့အစည်း အတွင်း လုပ်ငန်းများ လုပ်ဆောင် ရာ၌ ဤသည်ကို မရှင်းလင်း၍များ ဖြစ်သလား ဟူ၍ စဉ်းစား ဘွယ်ရှိသည်။ သမတ စနစ်ကို ကျင့်သုံး လျှက်ရှိသော အမေရိကန်ပြည် ထောင်စု နှင့် နိုင်းယှဉ်ပါမည်။ အမေရိကန်ပြည်ထောင်စု၏ သမတ သည် တပြည်လုံးတွင်  နိုင်ငံရေး၊ စီးပွားရေး၊ အုပ် ချုပ်ရေး စသည့် ကိစ္စများ အားလုံးအပေါ် နေ့စဉ် ကြီးကြပ် ကွပ်ကဲ ဖေါ်ဆောင်ရ သည့်  တာဝန်ရှိ သလို စစ်သေနာပတိချုပ်လည်း ဖြစ်သည်။

သမတသည် စစ်ရေးအရ တိုက်သင့်မသင့်၊ စစ်ပွဲကြီး တရပ်ကို ဆင်နွှဲသင့် မသင့်မဆုံးဖြတ်ခင် နိုင်ငံရေးအရ၊ နိုင်ငံတကာ ဆက်ဆံရေး အရ၊ နိုင်ငံ တကာ ဥပဒေအရ၊ သံတမန်ရေးအရ စသဖြင့် ဘက်ပေါင်းစုံမှ စဉ်းစား သုံးသပ်သည်။ ကာကွယ်ရေး ၀န်ကြီးနှင့် အစိုးရ အဖွဲ့ဝင်များ၊ အရပ် ဘက်ဆိုင်ရာ အမြင့်ဆုံးအရာရှိကြီးများအပြင် စစ်ဦးစီးချုပ်များကိုပါ ခေါ် ယူ၍ အကြံပေး မှုများရယူ သည်။ ပြီးလျှင် စစ်ပွဲကြီး တခုလုံကို စတင် ဆင်နွှဲသင့်မသင့် ၄င်းက ဦးဆောင် ဆုံးဖြတ်သည်။ ဆင်နွှဲ နေဆဲဖြစ်သော စစ်ပွဲကြီးကို ရပ်သင့်မသင့် ဟူသည်ကို လည်း ၄င်းကပင် ဦးဆောင် ဆုံးဖြတ်သည်။ စစ်ပွဲကြီး တခုလုံး အပေါ် တိုက်သင့်မသင့်၊ ရပ်သင့်မသင့် နှင့် စပ်လျှဉ်း၍ စစ်ဘက်ဆိုင်ရာ ကာကွယ်ရေး ဦးစီးချုပ်တွင် ဆုံးဖြတ်ခွင့် မရှိ။

စစ်ပွဲကြီး အားတိုက်ပါဟု အမိန့်ပေးလိုက်ပြီး နောက်တွင်မူ စစ်ရေးသက် သက် ဆင်နွှဲရာ၌ ဒီလိုတိုက်ပါ ဟိုလိုတိုက်ပါ ဟူ၍ သမ္မတ က ၀င်ရောက် စွက်ဘက်ခွင့် မရှိတော့။ စစ်ဦးစီးချုပ်၏ တာဝန်နှင့် လုပ်ပိုင်ခွင့် အတွင်း ကျရောက်သွား သည်။ ကာကွယ်ရေး ၀န်ကြီး၏ ကြီးကြပ်မှုအောက်တွင် စစ်ဦးစီးချုပ်က ဖေါ်ဆောင်သွားသည်။ စစ်ပွဲကြီး တခုလုံးဆင် နွှဲနေစဉ်
(စစ်ပွဲငယ်တခုချင်းစီနှင့် စပ်လျှဉ်း၍) စစ်ရေးပရိယယ် အနေဖြင့် မည် သည့် နေရာမှ စစ်ပွဲငယ်ကို ခဏရပ်ဆိုင်း ထားပြီး မည်သည့်နေရာတွင် အာရုံ စိုက်ကာ ထိုးစစ်ကြီးများ ဆင်နွှဲမည် ဟူသည်ကိုလည်း စစ်ဦးစီးချုပ် က ပင် ဆုံးဖြတ် လုပ်ဆောင် သွားမည်။ သမတ က အသေးစိတ်ဝင် ရောက်စွက်ဘက် တိုက်ရိုက် အမိန့်ပေးလေ့ မရှိ။ ဤသည်မှာ ဆက်စပ် မှုနှင့် ခွဲခြားတာဝန်ထမ်းဆောင် မှု သဘောဖြစ်သည်။

မိမိလေ့လာ၍ရသမျှ ကေအင်ယူတွင် လေးနှစ်တကြိမ်ကျင်းပသည့် ညီလာခံသည် အမြင့်ဆုံးဖြစ်သည်။ ညီလာခံ တခု နှင့် တခုအကြားတွင် အရေးကြီးသည့် နိုင်ငံရေး၊ စစ်ရေး ကိစ္စများအား ဗဟိုကော်မတီ အစည်း အဝေးခေါ်ယူ၍ ဆုံးဖြတ် ရသည်။ ဗဟိုကော်မတီ အစည်းအဝေးတခုနှင့် တခုအကြားတွင် ခေါင်းဆောင် (၁၁) ဦးပါဝင်သည့် အလုပ်အမှုဆောင် အဖွဲ့က အဖွဲ့အစည်းကို ဦးဆောင်သည်။ အဆိုပါ (၁၁) ဦးအနက် ဥက္ကဌ၊ ဒုဥက္ကဌ၊ အထွေထွေ အတွင်းရေမှုး၊ တွဲဘက် အထွေထွေ အတွင်းရေးမှုး (၁) နှင့် တွဲဘက် အထွေထွေ အတွင်းရေးမှုး (၂) တို့သည် (၄င်းတို့အား ကြီးငါးကြီးဟု အများက ခေါ်လေ့ရှိကြ) အဖွဲ့အစည်း၏ နေ့စဉ်လုပ်ငန်း များကို တာဝန်ယူ ဦးဆောင်ကွပ်ကဲသည်။ ၄င်းတို့ငါးဦးသည် အဖွဲ့ အစည်းအတွင်း အဖွဲ့အစည်း၏ နေ့စဉ် လုပ်ငန်းများကို ကြီးကြပ်ကွပ် ကဲရာ၌ အမေရိကန် ပြည်ထောင်စု သမတ တွင်ရှိသော အခွင့်အာဏာ မျိုးရှိသည်ဟု ယူဆသည်။

ဗဟိုကော်မတီ အစည်းအဝေး တခုနှင့် တခုအကြားတွင် စစ်ပွဲကြီးကို တိုက်သင့်မသင့်၊ ရပ်သင့်မသင့် ၄င်းတို့ငါးဦးက အလုပ် အမှုဆောင် အဖွဲ့အစည်းအဝေး ခေါ်ယူ၍ ညှိနိုင်းတိုင်ပင် သဘောထားဆန္ဒ နှင့် အကြံပေး ချက်များရယူကာ ဦးဆောင်ဆုံးဖြတ် သွားမည်ဖြစ်သည်။ လိုအပ်လျှင် ၄င်းတို့က အရေးပေါ် ဗဟိုကော်မတီ အစည်းအဝေး ခေါ် ယူ၍တင်ပြ ပြီး ဆုံးဖြတ်ချက် ခံယူကာ လုပ်ဆောင် သွားမည်ဖြစ်သည်။ စစ်ပွဲကြီးတပွဲကို စပြီး တိုက်သင့်မသင့်၊ တိုက်နေဆဲ စစ်ပွဲကြီး ကို ရပ်သင့်မသင့် ကေအင်ယူ စစ်ဦးစီးချုပ်၏ တဦးတည်း သဘောဖြင့် ဆုံးဖြတ်ခွင့် မရှိဟု မိမိနားလည်ပါသည်။ အလုပ် အမှုဆောင် အဖွဲ့ အစည်းအဝေး၌ ၄င်းတွင် တင်ပြခွင့်ရှိသည်။ စုပေါင်းဆုံးဖြတ်ခွင့်ရှိသည်။

အပစ်အခတ် ရပ်စဲရေး ဆွေးနွေးပွဲကို ကေအင်ယူ ကိုယ်စား ဦးဆောင် တက်ရောက်ခြင်းနှင့် အပစ်အခတ် ရပ်စဲရေး အတည် ပြု လက်မှတ်ရေး ထိုး လိုက်ခြင်း မှာ တာဝန်ပိုင်းအရ များစွာ ကွာခြားသည်။

ဗိုလ်ကြီးချုပ်ကြီးမြ မကွယ်လွန်ခင် နောက်ဆုံးနှစ်များတွင် ကေအင်ယူ၌ ဖဒိုစောဘသင်မှာ ဥက္ကဌဖြစ်ပြီး ဗိုလ်ချုပ်ကြီး စောဘိုမြမှာ  ဒုဥက္ကဌ ဖြစ်သည်။ စစ်အစိုးရအတွင်း၌ဗိုလ်ချုပ်ကြီး ခင်ညွန့် တံခိုးထွားခဲ့စဉ်က ဗိုလ်ချုပ်ကြီးမြသည်လည်း ကေအင်ယူအဖွဲ့ကို ခေါင်းဆောင်ကာ အပစ် အခတ် ရပ်စဲရေး ဆွေးနွေးပွဲသွားရောက်ခဲ့ဘူးပါသည်။ ဗိုလ်ချုပ်ကြီးမြ သည် စစ်ရေးသမားဖြစ်သော်လည်း ပြည်တွင်း ငြိမ်းချမ်းရေးကို နိုင်ငံရေး နည်းနှင့်သာ ရယူလိုသူ ဖြစ်ခဲ့သည်။ နိုင်ငံရေးနည်းနှင့် တွေ့ဆုံဆွေးနွေး ၍ ပြည်တွင်းငြိမ်းချမ်းရေး တည်ဆောက်ရန် လိုပြီဟုလည်း မြှော်လင့် ဦးဆောင်ခဲ့သူ ဖြစ်သည်။ သို့နှင့် ဗိုလ်ချုပ်ကြီး ခင်ညွန့် ဦးဆောင်သည့် စစ်ခေါင်းဆောင်များ နှင့် တွေ့ပြီး အပြန် အလှန်ဆွေးနွေးခဲ့ကြသည်။ သို့ရာတွင် ကေအင်ယူ ကိုယ်စား အပစ်အခတ် ရပ်စဲရေး လက်မှတ် မထိုးခဲ့ပါ။ ဆွေးနွေးပွဲမှ ပြန်လာပြီးနောက် ကေအင် ယူအလုပ် အမှု ဆောင်အဖွဲ့သို့ ပြန် လည်တင်ပြမှုများ ရှိခဲ့သော်လည်း အပစ်အခတ် ရပ်စဲရေးမဖြစ်ခဲ့။

အပစ်အခတ် ရပ်စဲရေးကို လက်ရှိစစ်ဦးစီးချုပ်မှ လက်မှတ်ရေးထိုး ခဲ့ခြင်းမှာ ကေအင်ယူ တခုလုံး၏ နေ့စဉ်လုပ်ငန်းများကို တာဝန်ယ ကြီးကြပ် ကွပ်ကဲလျှက် ရှိသော ထိပ်ပိုင်းခေါင်းဆောင် ငါးဦးထံမှ သဘောတူညီချက်ဖြင့် လုပ်ဆောင်ခဲ့ခြင်း ဟုတ်မဟုတ်တော့ စာရေးသူ ကိုယ်တိုင် အတိအကျ မပြောနိုင်ပါ။

ဗဟိုကော်မတီ အစည်းအဝေးနှင့် အလုပ်အမှုဆောင် ကော်မတီ အစည်း အဝေး ဆုံးဖြတ်ချက်များလည်း မရှိ၊ ထိပ်ပိုင်း ခေါင်းဆောင်ငါးဦးထံမှ သဘောတူညီချက် လည်းတောင်းခံခြင်းမပြုဘဲ စစ်ဦးစီးချုပ်အနေဖြင့် မိမိ သဘော အလျှောက် လက်မှတ်ထိုးခဲ့သည် ဆိုလျှင်မူ ၄င်းတွင် ဖြေရှင်းရန် တာဝန်ရှိသွားပြီ ဟု ယူဆပါသည်။ ကေအင်ယူမှ ခုခံဆင်နွှဲ လျှက် ရှိသော စစ်ပွဲကြီးတပွဲလုံးအား ရပ်ဆိုင်းလိုက်ခြင်းမှာ နိုင်ငံရေး အရများစွာ အဓိပ္ပါယ် သက်ရောက်သွား၍ဖြစ်သည်။

ကေအင်ယူ၏ လက်ရှိ အမြင့်ဆုံးအမှုဆောင်ကော်မတီသည် စစ်မှန်သော ငြိမ်းချမ်းရေး တည်ဆောက်ရန်အတွက် အခြေ အနေသင့်လာပြီဟု  ၄င်း တို့ အနေဖြင့် ဆုံးဖြတ်လျှင် အပစ်အခတ်ရပ်စဲရေးလုပ်ရန် ၀န်လေးကြ မည်မဟုတ်ပါ။သို့ရာတွင် စစ်အစိုးရက မြောက်ပိုင်း၌ ကချင် (ကေအိုင် အို) ကို စစ်ပွဲများတိုးမြှင့် ဆင်နွှဲလျှက်ရှိနေသည်။ ၁၉၉၃-၉၄ အတွေ့ အကြုံ အရ မြောက်ပိုင်းရှိကေအိုင်အိုကို ဖဲ့ထုတ်စည်းရုံးကာ သေနတ် များ ရပ်သွားအောင်လုပ်ပြီး တောင်ပိုင်းရှိ ကေအင်ယူ၏ ဌာနချုပ် မာနယ် ပလောကို စစ်ဆင်သိမ်းပိုက်သည့် အတွေ့အကြုံ ရှိခဲ့ဘူးပြီ။ ယခု လည်း ကေအင်ယူ၏ သေနတ်များကို ရပ်သွားအောင် လုပ်ပြီး ကေအိုင်အို ဌာနချုပ် လိုင်ဇာကို ထိုးစစ်ဆင်တိုက်ခိုက်ရန် စစ်အစိုးရ၌ မဟာဗျူဟာ ရှိကောင်း ရှိနိုင်သည်။ လိုင်ဇာကို အပြတ်ရှင်းပြီးလျှင် ကေအင်ယူက အပစ်အခတ် ရပ်ခြင်သည်ဖြစ်စေ၊ မရပ်ခြင်သည်ဖြစ်စေ စစ်အစိုးရ၏ တပ်များက အကြောင်းအမျိုးမျိုးပြကာ ကေအင်ယူကို ပြန်လည် စစ်ဆင်တိုက်ခိုက်လာ နိုင်သည်။

တပြည်လုံး အပစ်အခတ်ရပ်စဲရန် တိုင်းရင်းသားလက်နက်ကိုင် အဖွဲ့ အစည်းများ အားလုံးနီးပါးက ၀ိုင်းဝန်း တောင်းဆို နေကြသော်လည်း ကေအိုင်အိုကို အပစ်မရပ်သေး။ နောက်ပိုင်းတွင် အပစ်ရပ်ထားခဲ့သည့် အက်စ်အကစ်ပီပီ ရှမ်းတပ် ဖွဲ့များနှင့် ဆက်လက်တိုက်ပွဲများ ဖြစ်ပွားနေ ပြန်သည်။ သို့ဖြစ်၍ ကေအင်ယူနှင့် အပစ်အခတ်ရပ်ရန် လာ ရောက် ကမ်း လှမ်းနေမှုကို ဆွေးနွေးပွဲများ အကြိမ်ကြိမ်လုပ်၍ အချိန်ဆွဲထားပြီး တပြည်လုံးအပစ်အခတ်ရပ်စဲရေး လုပ်နိုင်သည်အထိ တွန်းတင်ပေး သွားရန် ကေအင်ယူ၏ ထိပ်ပိုင်းခေါင်းဆောင်ငါးဦး နှင့် အလုပ်အမှု ဆောင် ကော်မတီဝင် အများစု က နိုင်ငံရေး အရ ကျယ်ကျယ်ပြန့်ပြန့် စဉ်းစားကောင်း စဉ်းစားနေနိုင်သည်။ စာရေးသူ အတပ် မပြောနိုင်ပါ။

အပစ်အခတ် ရပ်စဲရေးဟူသည်မှာ စစ်ရေးနှင့်သာ သက်ဆိုင်သည်ဟူ၍ သဘောရိုးဖြင့်မှတ်ယူကာ စစ်ဦးစီးချုပ် အနေဖြင့် ရိုးရိုးသားသား လက် မှတ်ရေးထိုး ခဲ့ခြင်းလည်း ဖြစ်နိုင်ပါသည်။ အလုပ်အမှုဆောင် ကော် မတီမှ ချမှတ်ပေးလိုက်သည့် အချက် (၁၁) လုံးရရှိပြီးလည်းဖြစ်သည့် အပြင် မိမိကိုယ်တိုင် သည်လည်း စစ်ဦးစီးချုပ်ဖြစ်နေသဖြင့် အပစ်အခတ် ရပ်စဲ ရေး လက်မှတ်ရေးထိုး၍ ရနိုင်ကောင်းသည်ဟု သဘောရိုးနှင့် ယုံကြည်ကာ လက်မှတ်ရေးထိုး ခဲ့ခြင်း လည်း ဖြစ်နိုင်ပါ သည်။ ယင်း သို့ဖြစ်လျှင် အဖွဲ့အစည်း၏ အမြင့်ဆုံးခေါင်းဆောင်ငါးဦး နှင့်  ကျန် အလုပ် အမှုဆောင် အဖွဲ့ဝင်များကြေနပ် လက်ခံသည်အထိ ရှင်းပြဘို့  လိုပါမည်။ ရှင်းပြပြီးလည်း ဖြစ်နိုင်ပါသည်။ နောက်ပိုင်း ဆွေးနွေးပွဲ များ သို့ ကေအင်ယူ အထွေထွေ အတွင်းရေးမှုး ကိုယ်တိုင် တက်ရောက် သည်ကို တွေ့မြင်နေရ၍ဖြစ်သည်။

အဓိကမှာ နိုင်ငံရေးရည်မှန်းချက် အတွက် လက်နက်ကိုင်ကြခြင်းဖြစ် သော် လည်း လက်နက်ကိုင် တပ်သက်သက်က နိုင်ငံရေးကို လွှမ်းမိုးခြင်း မဖြစ်သင့်ပါ။ တပ်ကို ကိုင်ထားနိုင်သူက နိုင်ငံရေးကို ဆုံးဖြတ်သွားမည်၊ သေနတ်နောက်ကို နိုင်ငံရေးက လိုက်ရမည် ဟူသော အစဉ်အလာမျိုး တော်လှန်ရေး အဖွဲ့အစည်းများအတွင်း မရှိသင့်ပါ။

လူထုနိုင်ငံရေးက သေနတ်ကို ကြီးကြပ်ရပါမည်။ သေနတ်က လူထုနိုင်ငံ ရေးကို အမိန့်ပေးတာမျိုးမဖြစ်သင့်ပါ။ ကေအင်ယူ၏ လေးနှစ်တကြိမ် ညီလာခံမှ ရွေးချယ်တင်မြှောက်ခြင်းခံရသော အမြင့်ဆုံး ခေါင်းဆောင် ငါးဦးသည် လူထု နိုင်ငံရေးကို ကိုယ်စားပြုသည်ဟု စာရေးသူ နားလည်ပါ သည်။ ကေအင်ယူ စစ်ဦးစီးချုပ်သည် သေနတ်ကို ကိုယ်စားပြု သည်ဟု မြင်ပါသည်။ တော်လှန်ရေးတွင် သူ့နေရာနှင့်သူ အရေးပါကြသော်လည်း အဆင့်ဆင့် ဦးဆောင်မှုနှင့် တာဝန် ပိုင်းအရ ခွဲခြားထမ်းဆောင်မှုကို လက်တွေ့ လိုက်နာကျင့်သုံးခြင်း မပြုနိုင်လျှင် ပြသနာ ကြုံရတတ် ပါသည်။

သို့ရာတွင် ကေအင်န် ယူ စစ်ဦးစီးချုပ်သည် လုပ်ငန်းတာဝန်များကို သဘောရိုးဖြင့် ထမ်းဆောင်ပါလျှက် အားနည်းချက်များ ပေါ် ပေါက်ခဲ့ သည် ဟု သုံးသပ်လျှင် အလုပ်အမှုဆောင် ကော်မတီသည်လည်း ကောင်း၊ ဗဟိုကော်မတီသည် လည်းကောင်း စစ်ဦးစီးချုပ် အပေါ် ပြင်းပြင်းထန်ထန် အရေးယူ ထားသည့် ကိစ္စကို လျှော့ပေါ့စဉ်းစား လိမ့်မည်ဟု မြှော် လင့်ရပါသည်။

ဦးသိန်းစိန်ဦးဆောင်သည့် စစ်အစိုးရက ပြည်တွင်းငြိမ်းချမ်းရေး အတွက် တပြည်လုံး အပစ်အခတ် ရပ်စဲရေး ကို ရိုးသားစွာ ကြေငြာကာ တိုင်းရင်း သား လက်နက်ကိုင် အဖွဲ့အစည်းများအားလုံးနှင့် တပြိုင်တည်း တွေ့ဆုံ ဆွေးနွေးခြင်းမရှိပါ။ တပ်ကို ကိုင်ထားသည့် စစ်ဦးစီးချုပ်ကို ဖဲ့ထုတ်စည်း ရုံးရန် ကြိုးစားမှုများလည်း ရှိနိုင်ပါသည်။ အကျိုးဆက်အနေဖြင့် ကေအင် ယူကို ဦးဆောင်နေသည့် အလုပ်အမှုဆောင် ကော်မတီသည် ချိန်ညှိစဉ်း စားရမည့် နိုင်ငံရေး စစ်ရေး ကိစ္စများ များပြား လွန်းနေသည့်အချိန်တွင် မလိုလားအပ်သော ပြသနာများ ပေါ်ပေါက်ခြင်းဟု ပြောနိုင်ပါသည်။

ကေအင်ယူသည် ဤ အချိုးအကွေ့ကို အောင်မြင်စွာ ဖြတ်ကျော်နိုင်လျှင်၊ ကေအင်ယူအတွင်းရှိ ခေါင်းဆောင်များနှင့် တပ်မှုး တပ်သားများ အားလုံး သည် ကရင်အမျိုးသားထုတရပ်လုံး၏ အလံဖြစ်သော ကေအင်ယူ အလံ ကို လက်မှ မလွှတ်စတမ်း တညီတညာ ဆက်လက် ဆုတ်ကိုင်မြှင့်တင် ထား နိုင်လျှင် စစ်မှန်သော ပြည်တွင်း ငြိမ်းချမ်းရေးအတွက် အထောက် အကူများစွာဖြစ်မည်ဟု ယုံကြည်ပါသည်။

........................................................

စစ်တပ်မှာ စီးပွားရေးလုပ်ငန်း လုပ်ခွင့်ရှိသင့်သလား။ ကေအဲန်ယူဗဟိုမှ နေ၍ ကေအဲန်ယူ စစ်ဦးစီးချုပ်အား တာဝန်မှ ရပ်ဆိုင်းရသည့်အကြောင်း များတွင် စီးပွားရေး နှင့် ပတ်သက်သည့် ကိစ္စများကိုလည်း တွေ့ရသည်။ စွပ်စွဲချက်များ မှန်ကန်မှုမရှိလျှင် ဗိုလ်ချုပ်ကြီးမူတူးစေးဖိုးအနေ နှင့် အများ သိအောင်ရှင်းလင်းခွင့် ရှိပါသည်။  ရှင်းလင်းလိမ့်မည်ဟုလည်း မြှော်လင့် သည်။ စာရေးသူအနေဖြင့်မူ စစ်တပ်နဲ့ စီးပွားရေးဆိုင်ရာမူ သဘော အခြေခံမှ တင်ပြပါမည်။ ဤပြသနာမှာ တပြည်လုံးကို လှိုက်စားနေခြင်း ကြောင့်ဖြစ်သည်။

တော်လှန်ရေးတပ်ဖြစ်စေ၊ တိုင်းပြည်ကို တရားဝင်အုပ်ချုပ်နေသည့် အစိုးရ၏ တပ်ဖြစ်စေ စစ်အသုံးအဆောင်၊ ရုပ်ဝတ္တုပစ္စည်းနှင့် ငွေကြေး လိုအပ်သည်မှာ အမှန်ဖြစ်သည်။ သို့ရာတွင် စစ်တပ်အား စီးပွားရေး လုပ်ခွင့် ပေး၍မရပါ။ မြန်မာနိုင်ငံ၌စစ်အာဏာရှင်စနစ် သက်ဆိုးရှည်နေ သည်မှာ စစ်တပ်ကိုယ်တိုင်က စီးပွားရေးလုပ်ငန်းကြီးများ လုပ်ပြီး ၀င်ငွေ များကို အစစ်အဆေးမရှိ တိုက်ရိုက် သုံးစွဲခွင့်ရနေခဲ့၍ဖြစ်သည်။ စစ်အစိုး ရ၏ လက်ဝေခံ စီးပွားရေးသမား ကြီးများကလည်း ဝေစားမျှစားလုပ်ကာ စစ်တပ်စီးပွားရေးကို ကျားကန်ပေးထားသောကြောင့်ဖြစ်သည်။ ယင်း၏ အကျိုးဆက်အဖြစ် ထိပ်ပိုင်း စစ်ခေါင်းဆောင်များသာ ကျိကျိတက် ချမ်း သာသွားကြပြီး တပ်မှုးငယ်များအပါအ၀င် တပ်အောက်ခြေထု တခုလုံး နှင့်အခြေခံလူထုကြီးတရပ်လုံး ဆင်းရဲတွင်းနက်သွားခြင်းဖြစ်သည်။

ထိုနည်းတူပင် တော်လှန်ရေးတပ်ကို စီးပွားရေးလုပ်ခွင့် ပေးလိုက်လျှင် တပ်ခေါင်းဆောင်သည် စစ်အာဏာရှင်ဖြစ်သွားနိုင်ပါသည်။ အဘယ် ကြောင့်ဆိုသော် တပ်ခေါင်းဆောင်သည် လက်နက်ကိုင်တပ်ကို ကိုင်ထား သဖြင့် စစ်ရေးအာဏာရှိနေသည့် တချိန်တည်းတွင် စီးပွားရေးအာဏာပါ ရှိသွားသောကြောင့်ဖြစ်သည်။ ယင်းသို့ဖြစ်လျှင် တော်လှန်ရေးတပ် ၏ စစ်ဦးစီးချုပ်ကို မည်သူမျှ ထိမ်းကြောင်း၍မရတော့။ ထင်ရာစိုင်းပြီး လုပ် ခြင်ရာလုပ်တော့သည်။ အခြေခံလူထုများ အနေဖြင့် နည်းလမ်းပေါင်းစုံ သုံး၍ စစ်အာဏာရှင်ကြီးစနစ်ကို တိုက်နေသည့်အချိန်တွင် စစ် အာဏာရှင်ကလေးများ ဟိုက သည်က ပေါ်လာတာမျိုးမဖြစ်သင့်ပါ။

“အောက်ခြေတပ်ထု ငတ်ပြတ်ပြီး စားစရာ မရှိဖြစ်နေတယ်။ ယူနီဖေါင်း၊ ဖိနပ်၊ စစ်အသုံးအဆောင်တွေကအစ မရှိ ဘူး။ လက်နက်ခဲယမ်းမီး ကျောက် ပြည့်စုံဘို့ဆိုရင် ဝေးရော။ ဒီလိုအပ်ချက်တွေကို ဖြည့်ဆည်းပေး ဘို့ တပ်အနေ နဲ့စီးပွားရေးလုပ်ငန်းတွေကို တွဲပြီး မလုပ်ရင် ဓါးပြတိုက်ရ မလား။” ဟူ၍ တော်လှန်ရေးတပ်ခေါင်းဆောင်အနေဖြင့် စောဒက တက် ကောင်းတက်ပါမည်။ တော်လှန်ရေးကို တပ်သက်သက်ဖြင့် ဖွဲ့စည်းလည် ပတ်ခြင်း မဟုတ်ပါ။ အရပ်ဘက်အဖွဲ့အစည်းများ ရှိပါသည်။ ၄င်းတို့က တာဝန်ယူပြီး တော်လှန်ရေးတပ်၏ လိုအပ်ချက်ကို ဖြည့်ဆည်း ရပါမည်။ ကေအဲန်ယူသည် ဤ အတိုင်းပင် ကျင့်သုံးလျှက်ရှိကြောင်း နားလည်ပါ သည်။

ဗိုလ်ချုပ်ကြီး မူတူးစေးဖိုးအနေဖြင့် “ကျုပ် ဦးစီးချုပ်လုပ်ခဲ့သမျှ တပ်အနေ နဲ့ ဘယ်တုန်းကမှ စီးပွားရေး မလုပ်ခဲ့ဘူး။ နောင်လဲ လုပ်မှာ မဟုတ်ဘူး။ လုပ်ဘို့လဲ မညွှန်ကြားဘူး။” ဟူ၍ အများသိ ရှင်းလင်းလိမ့်မည်ဟု မြှော်လင့် သည်။ စစ်ဦးစီးချုပ်အနေဖြင့် တပ်အောက်ခြေထု၏ လိုအပ် ချက်များကို ဖြည့်ဆည်းရန် သဘောရိုးဖြင့် ဆောင်ရွက်ခဲ့မှု များ ဖြစ်ပါက ပြန်လည်ညှိနိုင်းတင်ပြပြီး နောင်မဖြစ်အောင်ရှောင်ကြဉ်မည်ဟု တာဝန်ခံ လျှင် ညီညွတ်ရေးအတွက် အကူအပံ့များ ဖြစ်လေမလားဟု မြှော်မှန်းပါ သည်။ စစ်တပ်တွင် တာဝန်ထမ်းဆောင်ဆဲ မည်သည့် တပ်မှုးတပ်သား ကိုမျှ စီးပွားရေးလုပ်ငန်းတွင် တာဝန်ပေးအပ်ခြင်း မပြုသင့်ပါ။ ဤမူကို ယခုကစ၍ တင်းကြပ်စွာ လိုက်နာလုပ်ဆောင် ခြင်းဖြင့် တော်လှန်ရေး အဖွဲ့အစည်းများ၌ နောင်အလားတူ ပြသနာမျိုးမဖြစ်ရန် ရှောင်လွှဲနိုင် မည့်အပြင် အနာဂါတ်ပြည် ထောင်စုအတွက်ပါ အုတ်မြစ်ကောင်း ချရာ ရောက်ပါမည်။

အပစ်အခတ်ရပ်စဲရေးကို စီးပွားရေး မြှော်မှန်းချက်ဖြင့် လုပ်သင့်သလား။

ဖက်ဒရယ်ပြည်ထောင်စု တည်ဆောက်ရေးအပေါ်အခြေခံသည့် စစ်မှန် သည့် ပြည်တွင်းငြိမ်းချမ်းရေး နိုင်ငံရေး ရည်မှန်းချက်ကို ကိုင်စွဲကာ ကေ အဲန်ယူဗဟိုသည် အပစ်အခတ်ရပ်စဲရေး လုပ်ဆောင်နေခြင်းဟု နားလည် ပါသည်။ အပစ်အခတ် ရပ်စဲရေးကို စီးပွားရေးရည်မှန်းချက်ဖြင့် မလုပ်သင့် ပါ။ အကယ်၍ ကေအဲန်ယူ အလံအောက်မှ ခွဲထွက်၊ သီးခြားအဖွဲ့ တခု ထပ်ထောင်၊ အပစ်အခတ်ရပ်စဲရေးကို အခွင့်ကောင်းယူကာ စီးပွားရေး လုပ်ငန်းများ လုပ်မည်ဆိုပါက မည်မျှအထိ လက်တွေ့အကျိုးရှိမရှိ သုံးသပ်ရန်လိုပါမည်။

မွန်ပြည်သစ်ပါတီသည် အပစ်အခတ်ရပ်စဲရေးကို ၁၇ နှစ်တာ လုပ်ခဲ့ပြီး ဖြစ်ပါသည်။ စစ်အစိုးရက ပါတီအား လုပ်ငန်း လိုင်စင်များ တဘက်က ချပေးသော်လည်း အခြားတဘက်က ၄င်းလုပ်ငန်းများ အလုပ်မဖြစ်ရန် အနှောက်အယှက် ပြုသည်။ ပါတီအနေဖြင့် စီးပွားရေးအရ ဟုတ္တိပတ္တိ ထိထိရောက်ရောက် အကျိုးမရှိခဲ့ပါ။ အပစ်အခတ်ရပ်စဲခဲ့သော အခြား အဖွဲ့ငယ်အတော်များများတွင် စီးပွားရေးလုပ်ငန်းများ လုပ်ခွင့်ရခဲ့သည့် ထိပ်ပိုင်း သို့မဟုတ် အလတ်ပိုင်း စစ် ဘက်၊ အရပ်ဘက် ခေါင်းဆောင် အတော်များများ ပုဂ္ဂိုလ်တဦးခြင်းအရ ကြီးပွားချမ်းသာ သွားကြသည်။ အောက်ခြေ ရဲဘော်ထုများနှင့် လူထုများမှာ ဆင်းရဲတွင်းမှ မတက်ခဲ့ပါ။

ဦးသိန်းစိန် ဦးဆောင်သည့် စစ်အစိုးရသစ်သည် နိုင်ငံတော်ပိုင် မြေယာ စနစ်ဆိုသည်ကို အတင်းအကြပ် အကောင် အထည်ဖေါ်ကာ ဒေသခံလူ ထုများ၏ ဒေသအလိုက် စုပေါင်းပိုင်ဆိုင်သည့် မြေယာစနစ်ကို အသိ အမှတ်မပြု။ စစ်အစိုးရ ကိုယ်တိုင်ချိုးဖေါက် လုပ်ကိုင်သည့်အပြင် နိုင်ငံ ခြား ကုမ္ပဏီကြီးများ၊ ပြည်တွင်း လက်ဝေခံ ဓနရှင်ကြီးများ၏ ကုမ္ပဏီများ အား မြေယာဆိုင်ရာ လုပ်ပိုင်ခွင့် အမျိုးမျိုးချပေးသောကြောင့် သဘာဝနှင့် ပတ်ဝန်းကျင်ကိုမှီခို၍ ဒေသခံလူ ထု (ကရင်ပြည်နယ် အတွင်း၌ ကရင် လူထု) ၏ အသက်ရှင်ရပ်တည်ခွင့်အား အကြီးအကျယ်ထိပါးလျှက် ရှိသည်။ သာဓက အားဖြင့် ဆိုလျှင် တောင်ငူခရိုင် သောက်ရေခပ်ချောင်း ရေလှောင်တာတမံ တည်ဆောက်မှုအား ကရင်လူထုက ကန့်ကွက် ဆန္ဒ ပြမှုများ ဖြစ်ပေါ်လျှက်ရှိရာ လူထုက ကေအဲန်ယူကို အားကိုးကြသည်။ ဒေသခံ ကေအဲန်ယူကလည်း တတ်နိုင်သမျှ လူထုကို အကူအညီပေး လျှက်ရှိကြောင်းကြားရသည်။

ထိုနည်းတူစွာ တောင်ပိုင်းတွင် ထားဝယ်ရေနက်ဆိပ်ကမ်းနှင့် အထူးစီး ပွားရေးဇုံစီမံကိန်းအား စစ်အစိုးရက အကောင် အထည်ဖေါ်လျှက် ရှိသည်။ ယင်းစီမံကိန်းအရ ထားဝယ်မှနေ၍ ကရင်လူမျိုးများ အများစု နှစ်ရာပေါင်းများစွာ အခြေစိုက်နေထိုင်သည့်ဒေသများကို ဖြတ်ကာ ထိုင်းနိုင်ငံအရောက် လမ်းဖေါက်လုပ်သောအခါ ဒေသခံကရင်လူထုမှာ ဘ၀ပျက် တော့သည်။ ကရင်လူထုများ စုဝေးကာ ဘုရားသခင်ထံ ဆု တောင်းပွဲများ ကျင်းပရုံမှလွဲ၍ ဘာမျှ မတတ် နိုင်ကြ။ ဒေသခံလူထုသည် ကေအဲန်ယူကို အားကိုးလိုကြသည်။

ကေအဲန်ယူသည် ဒေသခံကရင်လူထု၏ အကျိုးကို တကယ်တန်း သယ် ပိုးလိုသည်ဆိုပါက မည်သည့် အစိပ်အပိုင်း ကမျှ ခွဲထွက်ခြင်း၊ သို့မဟုတ် နှစ်ဖွဲ့ခွဲ၍ ရပ်တည်ခြင်း စသည်တို့မဖြစ်သင့်ပါ။ အလံတော် တခုတည်း၊ ဗဟိုဦးဆောင်မှု တခုတည်း၏ အောက်တွင် စည်းလုံးညီညွတ်စွာဖြင့် ကရင်လူထု၏ ဘ၀နစ်နာမှုများအား ဖေါ်ထုတ်၊ လူထုဘက်မှ တင်း တင်း မာမာ ရပ်တည်ကာ စစ်အစိုးရ တာဝန်ရှိသူများနှင့် အရေးဆိုလိမ့်မည်ဟု မြှော်မှန်းပါသည်။ ကေအဲန်ယူ ဆက်ဆံရေးရုံးများ ဖွင့်ခြင်းမှာ စစ်အစိုးရ ချပေးသမျှ စီးပွားရေးလုပ်ငန်းကလေးများအား ကေအဲန်ယူအတွက် သက် သက်သာ လုပ်ခြင်းထက် ကရင်လူထု၏ အခွင့်အရေးအတွက် ခုခံကာ ကွယ်တိုက်ပွဲဝင်ရန် ဖွင့်ခြင်းမျိုးဖြစ်သင့်ပါသည်။ ဤသည်မှာ ကေအဲန်ယူ စည်းလုံးညီညွတ်မှုအခြေခံတွင် အပစ်အခတ်ရပ်စဲရေးကို နိုင်ငံရေးရည် မှန်း ချက်နှင့် ဖေါ်ဆောင်မှသာဖြစ် နိုင်ပါမည်။ ကွဲကြပြီဆိုလျှင်တော့ နှစ်ဘက်လုံးထိခိုက်ရုံမက လူထုမှာ အနစ်နာဆုံးဖြစ်ပါမည်။

အဖွဲ့အစည်းအတွင်း ဒီမိုကရေစီ ကျင့်သုံးခြင်း နှင့် ” ဂိုဏ်းဂဏ ”

ကေအဲန်ယူဗဟို၏ ဒုတိယစွပ်စွဲချက်မှာ စစ်ဦးစီးချုပ်သည် အဖွဲ့အစည်း တည်ဆောက်မှုအရ အဆင့်ဆင့်ဦးဆောင်မှုကို လိုက်နာခြင်းမရှိ။ စော ဒေးဗစ်ထော၊ ဗိုလ်မှုးရော်ဂျာတို့ဖြင့်သာ သုံးဦး အုပ်စုဖွဲ့၍ ဆောင်ရွက်ခဲ့ သည် ဟူ၍ဖြစ်သည်။
စွပ်စွဲချက်မှန်သည် မမှန်သည်ကို စာရေးသူ ကိုယ်တိုင်မသိပါ။ သို့ရာတွင် အုပ်စုဖွဲ့သည့် သဘောကိုတော့ ဆွေးနွေးလို ပါသည်။ နိုင်ငံရေးတွင် ဤသည်ကို မြန်မာစကားဖြင့် ” ဂိုဏ်းဂဏ ” ဟု ခေါ်ပါသည်။

ပါတီများတွင် ပါတီတွင်း ဒီမိုကရေစီ ကျင့်သုံးရပါသည်။ ဥပမာ ၁၁ ဦးရှိ သော ကော်မတီတွင် မဲခွဲဆုံးဖြတ်ရန်လိုပါက (၆) မဲရသည့် ဘက်က နိုင်ပြီး (၅) မဲရသည့်ဘက်က ရှုံးပါသည်။ (၅) မဲရသည့် ဘက်က (၆) မဲရ သည့်ဘက်၏ အဆိုကို လက်ခံလိုက်နာ ဖေါ်ဆောင်ရပါသည်။ ဤသည် မှာ အခြေခံအားဖြင့် ဒီမိုကရေစီ ဖြစ်သည်။ ကော်မတီဝင်တဦးသည် အဆိုတခု ကို ဆုံးဖြတ်မဲပေးရာ၌ တခါတရံ အဖြူဘက်မှာရှိမည်။ တခါတရံအမဲဘက်မှာ ရှိမည်။ တခါတရံအ၀ါ ဘက်မှာရှိမည်။ ဤသည်မှာ ဖြစ်လေ့ဖြစ်ထပင်။ ပြသနာမရှိ။

ဥပမာအားဖြင့် ကော်မတီဝင် ၁၁ ဦးအနက် သုံးဦးကို လေ့လာကြည့်ကြ ပါစို့။ အဆို (၁) ကို မဲပေးရာ၌ တဦးသည် အဖြူဘက်မှာရှိပြီး အခြားနှစ် ဦးက အမဲ နှင့် အ၀ါဘက်မှာ ရှိနိုင်သည်။ ပြသနာမရှိ။ အဆို (၂) ကို မဲပေးရာ၌ တဦး သည် အမဲဘက်မှာရှိပြီး အခြားနှစ်ဦးက အ၀ါနှင့် အဖြူ ဘက်မှာ ရှိနိုင်သည်။ ပြသနာ မရှိသေး။ အဆို (၃) ကို မဲပေးရာ၌ သုံးဦး လုံးသည် အမဲဘက်မှာရှိနိုင်သည်။ ဤသည်မှာလည်း ပြသနာ မရှိသေး။ သို့ရာတွင် ၁၁ ဦးပါဝင်သည့် ကော်မတီအစည်းအဝေး ကျင်းပရာ၌ မည် သည့် အဆိုကိုဘဲ ဆွေးနွေးသည်ဖြစ်စေ အဆိုပါ သုံးဦးသည် အစဉ်အမြဲ ပင် ရပ်တည်ချက် တခုတည်းအပေါ်တွင် ရှိနေကြသည်ဆိုလျှင် အုပ်စုများ ဖွဲ့နေသလားဟူ၍ စဉ်းစားဘွယ် ရှိလာသည်။ ထိုမျှမက ကော်မတီ အစည်းအဝေး ဆုံးဖြတ်ချက်ရှိမှသာ လုပ်ပိုင်ခွင့်ရှိသော ကိစ္စရပ်မျိုးကို ကော်မတီအစည်းအဝေးသို့ မတင်ပြဘဲ အစည်းအဝေးအပြင်တွင် သုံးဦးဖြင့်သာ ညှိနိုင်း၍ လုပ်ဆောင်ခြင်း၊ ကော်မီတီ အစည်းအဝေးကို မတင် ရုံမျှမက ကော်မတီ၏ ထိပ်ပိုင်းခေါင်းဆောင်ငါးဦးထံမှ ခွင့်ပြုချက် မရယူဘဲ ဆောင်ရွက်ခြင်း၊ ထပ်ခါတလဲလဲ ဆောင် ရွက်ခြင်းများ ရှိလာလျှင် အုပ်စုဖွဲ့ပြီ။ ” ဂိုဏ်းဂဏ ” ဖြစ်သွားပြီဟု ပြောနိုင်သည်။ တော်လှန်ရေးပါတီ တရပ်၌ ” ဂိုဏ်းဂဏ ” ၀င်သွားပြီဆိုလျှင် ပါတီတွင်း ဒီမိုကရေစီ ဆိတ်သုဉ်းသွားပြီဖြစ်သဖြင့် အာဏာရှင်ပါတီ ဖြစ်လျှင်ဖြစ်၊ မဖြစ်လျှင် ပါတီ ပျက် မည့် အခြေအနေသို့ရောက်သွားနိင်ပါသည်။ သို့ဖြစ်၍ တော်လှန်ရေးပါတီအတွင်း၌ ” ဂိုဏ်းဂဏ ” ကို လုံးဝ လက်မခံ သင့်ပါ။

တချိန်တည်းတွင် လောက၌ သံသယဖြင့် စွပ်စွဲမှုများလည်း ရှိတတ်သည်။ ခင်ရာမင်ရာ အတွေးအခေါ်ခြင်းတူညီရာ ပုဂ္ဂိုလ်အချင်းချင်း သဘောရိုး ဖြင့် စုစည်းဆောင်ရွက်ခြင်းမျိုးကို အုပ်စုဖွဲ့သည်ဟု မြင်တာမျိုးလည်း ဖြစ်နိုင်သည်။ အုပ်စုဖွဲ့သည် ဟု စွပ်စွဲခံရသောခေါင်းဆောင်များတွင် ခုခံချေပခွင့် အပြည့်အ၀ ရှိသင့်ပါသည်။ အုပ်စုဖွဲ့ခြင်းမဟုတ် ပါဟု အတိ အလင်း ရှင်းပြခွင့်ရှိသင့်သည်။ ပွင့်ပွင့်လင်းလင်း ညှိနိုင်းဆွေးနွေးကြ၊ အပြန်အလှန်ထောက်ပြကြခြင်းဖြင့် အမှားရှိလျှင် ရိုးသားစွာဝန်ခံ၊ အမှန်ကို ရှေ့ရှု၊ သို့မဟုတ် သံသယဖြင့် စွပ်စွဲခြင်းဖြစ်လျှင် ပြန်လည် ရုပ်သိမ်း၊ စသည့် နည်းများဖြင့် ရောဂါကို ကုသ လူနာကို ကယ်တင်သင့် ပါသည်။ ရောဂါရှင်ကို ဆေးရုံပေါ်မှ နှင်ချခြင်းမျိုး မဖြစ်သင့်ပါ။ သို့ရာတွင် ရောဂါရှင်ကိုယ်တိုင်က ဆေးဝါးကုသခြင်း မခံလိုတော့ဟူလျှင်လည်း မည်သို့မျှ တတ်နိုင်မည် မဟုတ်ပါ။
နိုင်ငံရေးအရ ဤမျှ အရေးကြီးနေသည့်အချိန် အထူးသဖြင့် ကရင်လူထု ကြီး တရပ်လုံးနီးပါးနှင့် မဟာမိတ် အဖွဲ့အစည်းများက ကေအဲန်ယူ၏ စည်းလုံးရေးကို တောင်းဆို၊ အားပေး၊ လိုလားနေကြသည့်အချိန်တွင် ကေအဲန်ယူ သည် ရောဂါကို ကုသ လူနာကို ကယ်တင်သည့်နည်းကို အသုံးပြုလိမ့်မည် ဟု မြှော်လင့်ပါသည်။

.............................................................................

ကေအဲန်ယူ ဟူသည်မှာ အဘယ်နည်း။

အောက်တိုဘာလ (၁၂) ရက်နေ့နံက်တွင် ဘီဘီစီမှ မင်္ဂလာရှိသော သတင်းကြားလိုက်ရပါသည်။ ယင်းမှာ ကေအဲန်ယူအတွင်းပြန်လည် ညှိနိုင်းလို့ရပြီဖြစ်ပြီး ခေါင်းဆောင်များ ဗဟိုကော်မတီ အစည်းအဝေးကို အတူတက်ကြမည် ဟူ၍ဖြစ်သည်။ အောက်ခြေ ကေအဲန်ယူ ပါတီဝင်များ၊ တပ်မှူးတပ်သားများနှင့် ကရင်လူထုများသာမက ပြည်တွင်းငြိမ်းချမ်းရေး ကို မြတ်နိုးကြိုးပမ်းလျှက်ရှိသော အဖွဲ့အစည်းများ၏ ခေါင်းဆောင်များပါ များစွာ စိတ်သက်သာရာ ရသွားကြပါမည်။ စာရေးသူလည်း အလားတူ ပင်ဖြစ်သည်။ သို့ရာတွင် ဗဟိုကော်မတီ အစည်းအဝေးအပြင် လေးနှစ် တကြိမ်ကျင်းပမည့် ညီလာခံကြီးပြီးမှသာ သေချာပါမည်။

ကျင်းပတော့မည့် ဗဟိုကော်မတီအစည်းအဝေးနှင့် ကွန်ဂရက်သည် ကေအဲန်ယူနှင့် ကရင်တမျိုးသားလုံး အတွက် အဖိုးမဖြတ်နိုင်သော အမွေအနှစ်အဖြစ် ချန်ထားနိုင်ရုံသာမက အခြားတိုင်းရင်းသား အဖွဲ့ အစည်းများ အားလုံးအတွက်ပါ စံနမူနာကောင်းအဖြစ် သမိုင်းတွင် ရစ်စေ ချင်ပါသည်။ အဘယ်ကြောင့် ဤမျှ သမိုင်းနှင့်ချီ၍ ဆိုရပါသနည်း။ ယင်းကို နားလည်နိုင်ရန်မှာ ကေအဲန်ယူ ဟူသည်မှာဘာလဲ ပြန်လည် သုံးသပ်ကြည့်ရပါမည်။

ခက်ခဲကြမ်းတမ်းသည့် လက်နက်ကိုင် တော်လှန်စစ်ကို အဆက်မပြတ် ဆင်နွှဲခဲ့ရသဖြင့် ကေအဲန်ယူတွင် လည်းကောင်း၊ ကေအဲန်ယူခေါင်း ဆောင် များတွင်လည်းကောင်း အားနည်းချက်များအမြောက်အများ ရှိနိုင်ပါသည်။ သို့ရာတွင် အနှစ်သာရကို မြင်အောင်ကြည့်ဘို့လိုပါမည်။

ကရင့်တော်လှန်ရေးဟာ ကရင်အမျိုးသားတွေအတွက်သာမက တိုင်းရင်း သားပေါင်းစုံလူထုကြီးအတွက်ပါ ဖြစ်စေရမယ် ဟူ၍ကြွေးကြော် ခဲ့သည့် ဗိုလ်ချုပ်ကြီးစောဘိုမြ၏ ဦးဆောင်မှုကို ခံယူခဲ့သည့် အဖွဲ့အစည်း၊ ကရင် အမျိုးသားထုတရပ်လုံး ကိုယ့်ကြမ္မာ ကိုယ်ဖန်တည်းခွင့် ရရှိရေးမှသည် တိုင်းရင်းသားပေါင်းစုံ လူထုကြီးတရပ်လုံး ဖက်ဒရယ် ပြည်ထောင်စု တည်ဆောက်ရေးနိုင်ရေးအထိ နှစ်ပေါင်း ၆၀ကျော် မဆုတ်မနစ် တိုက်ပွဲ ၀င်လာခဲ့သည့် အဖွဲ့အစည်း၊ မာနယ်ပလော လွတ်မြောက်နယ်မြေကို စစ်အာဏာ ရှင်များက စစ်ရေးနည်းသက်သက် ဖြင့် တိုက်၍မရနိုင် လောက်အောင် ဦးဆောင်ကာ ကြံ့ကြံ့ခံ တိုက်ပွဲဝင်နိုင်ခဲ့သည့် အဖွဲ့ အစည်း၊ ရှည်ကြာလှသည့် ပြည်တွင်းစစ်အတွင်း ကရင်ကျေးရွာများ၏ ပြာပုံများ၊ ကရင်လူထု၏ သွေးနှင့်မျက်ရည်များ၊ ကရင်ရဲဘော်များ၏ အသက်နှင့် ခန္ဓာကိုယ်များကို မရေမတွက်နိုင် လောက်အောင် စွန့် လွှတ်ခဲ့ရသော်လည်း လက်နက်ကိုင် တော်လှန်ရေးကို အလံမလှဲ စတမ်းမြှင့်တင်ထားနိုင် သည့် အဖွဲ့အစည်း၊ မြန်မာ နိုင်ငံ၌ စစ်အာ ဏာရှင်စနစ် တည်ရှိနေသမျှ ကျားကုတ်ကျားခဲဆက်လက် တိုက်ပွဲဝင် သွားလိမ့်မည်ဟူ၍ မဟာမိတ်များက မျှော်လင့်ခံရ သော အဖွဲ့အစည်း၊ ဤသည်မှာ ကေအဲန်ယူဖြစ်သည်။

အပစ်အခတ်ရပ်စဲရေး အဓိက ငြိမ်းချမ်းရေး ဆွေးနွေးပွဲလား။ ငြိမ်းချမ်းရေး ဆွေးနွေးပွဲအဓိက အပစ်အခတ်ရပ်စဲရေးလား။

စစ်အစိုးရသည် တိုင်းရင်းသားလက်နက်ကိုင်အဖွဲ့အစည်းများနှင့် အပစ်အခတ်ရပ်စဲရေးများအား ၁၉၈၉ ခုနှစ်မှ စတင်ကာ အဓိကထား၍ လုပ်ဆောင်ခဲ့သည်။ သို့ရာတွင် ငြိမ်းချမ်းရေးအတွက် နိုင်ငံရေးအရ တွေ့ဆုံဆွေးနွေးမှုများအား မည်သည့်အခါတွင်မျှ အဓိကထား မလုပ်ခဲ့။

၂၀၁၀ ခုနှစ် ရွေးကောက်ပွဲ မတိုင်ခင်အတွင်း အပစ်အခတ်ရပ်စဲထား သည့် အဖွဲ့အစည်းများ နယ်ခြားစောင့်တပ်ဖွဲ့စည်း အသွင်ပြောင်း ရေးကို စစ်အစိုးရက ဖိအားပေးဖေါ်ဆောင်ရန်ကြိုးပမ်းခဲ့သည်။ အဖွဲ့ငယ်တချို့မှ လွဲ၍ ၀သပ၊ ကေအိုင်အို၊ မွန်ပြည်သစ်ပါတီ အစရှိသည့် အဖွဲ့အစည်းကြီး များက ဆန့်ကျင်ရပ်တည်ကြသောအခါ ၄င်း၏ အစီအစဉ် ရပ်ဆိုင်းသွား ခဲ့ရသည်။ ကချင်အမျိုးသား အစည်းအရုံး (ကေအိုင်အို)နှင့် တိုက်ပွဲများ ပြန်လည်ဖြစ်ပွားလာပြီးနောက် ကေအိုင်အို၏ နိုင်ငံရေးရပ်တည်ချက်မှာ ရှင်းလင်းပြတ်သားလာသည်။

၁၇နှစ်တာ အပစ်ရပ်ခဲ့သော်လည်း နိုင်ငံရေးအရဆွေးနွေးမှု ဘာတခုမျှ မဖြစ်ခဲ့ကြောင်း ကေအိုင်အိုက ထောက် ပြလာခဲ့သည်။ ငြိမ်းချမ်းရေး အတွက် နိုင်ငံရေးအရဆွေးနွေးအဖြေရှာမှုကို အမြန်ဆုံးဖေါ်ဆောင် ရန်မှာ ပဓာနကျကြောင်း၊ ပင်လုံစာချုပ်အပေါ် အခြေခံ လျှက် ဆွေးနွေးအဖြေရှာ ပြီးနောက် ရရှိလာသည့် ဘုံသဘောတူညီချက်ဖြင့် အခြေခံဥပဒေကို ပြင်ဆင်ရေးဆွဲသွားမှသာ ပြည်တွင်းငြိမ်း ချမ်းရေးရနိုင် မည်ဖြစ်ကြောင်း ကေအိုင်အိုက တောင်းဆိုလာခဲ့သည်။ ဆိုလိုသည်မှာ စစ်အစိုးရက တပြည်လုံး အပစ်အခတ်ရပ်စဲရေးကို ကြေငြာ၊ တပြိုင်နက်တည်းတွင် ငြိမ်းချမ်းရေးအတွက် နိုင်ငံရေးအရ တွေ့ဆုံဆွေးနွေးမှုများကို ချက်ခြင်း လုပ်ဆောင်သွားရန် ဖြစ်သည်။

ငြိမ်းချမ်းရေးဆွေးနွေးပွဲများကို အဓိကဖေါ်ဆောင်ပြီး အပစ်အခတ်ရပ်စဲ ရေး လုပ်ရေး ကေအိုင်အို၏ အဆိုပြုချက်မှာ စစ်အစိုးရအတွက် အနာပေါ် တုတ်ကျ ဖြစ်သွားခဲ့သည်။ သို့ဖြစ်၍ ကေအင်ယူ၊ မွန်ပြည်သစ်ပါတီ၊ ရှမ်း အက်စ်အက်စ် ပီပီ အစရှိသည့် အဖွဲ့အစည်းကြီးများအား အချိုသတ် ထားပြီး ကေအိုင်အိုကို ဖိကာထိုးစစ်ဆင်ပါတော့သည်။ အကယ်၍ ကေအိုင်အိုကို ပြန်လည်တိုက်ပွဲဆင်သည့် တနှစ်ခွဲမျှကာလအတွင်း နိုင်ငံရေးဆွေးနွေးပွဲများ လုပ်ဆောင်ခဲ့လျှင်ပင် အတော်ပင်ခရီးပေါက် နေပါမည်။ သို့ရာတွင် ဦးသိန်းစိန် ဦးဆောင်သည့် စစ်အစိုးရသစ်သည် ယခင် န၀တ နအဖ စစ်အစိုးရအဆက်ဆက် ကဲ့သို့ပင် အပစ်အခတ်ရပ်စဲ ရေး ဆွေးနွေးပွဲများကိုသာ အဓိကထားလုပ်နေဆဲ ဖြစ်သည်။

ငြိမ်းချမ်းရေးအတွက် နိုင်ငံရေးအရတွေ့ဆုံဆွေးနွေးရန် တိုင်းရင်းသား လက်နက်ကိုင် အဖွဲ့အစည်းအများ စုကြီး ပါဝင်ခဲ့သည့် တပ်ပေါင်းစု က ၁၉၉၀ ခုနှစ်ကထဲက စတင်တောင်းဆိုခဲ့ခြင်းဖြစ်သည်။ ယခုလည်း ထုတ်ပြန်ကြေငြာချက်ပေါင်း များစွာဖြင့် တောင်းဆိုဆဲဖြစ်သည်။ အာဏာရနေသော စစ်အစိုးရအဆက်ဆက် သည် စစ်မှန်သော စေတနာ ရှိပါက ငြိမ်းချမ်းရေးအတွက် နိုင်ငံရေးဆွေးနွေးပွဲများအား အခုလုပ် အခုရ သည်။ နောက်ထပ် အချိန်ဆွဲရန်အကြောင်း ဘာမျှမရှိ။

ငြိမ်းချမ်းရေးကို လိုလားပါသည်ဟု ကမ္ဘာသိ အော်ဟစ်နေသော ဦးသိန်းစိန်အစိုးရ၏ သက်တမ်းတနှစ်ခွဲ ကျော်အတွင်း ပြည်တွင်းစစ် ဘာကြောင့်ဖြစ်ရသည်ကို ဘက်ပေါင်းစုံမှ ဖေါ်ထုတ်ဆွေးနွေးမှု လူထုများ အတွင်း ပေါ်လာအောင် စတင်လုပ်ဆောင်နေသည်ကို မတွေ့ရ။ အပစ် အခတ်ရပ်စဲရေးဆွေး နွေးပွဲများနှင့်သာ အချိန်ဆွဲထားလျှက်ရှိသည်မှာ အထင်အရှားပင်။ အဘယ်ကြောင့် ဆိုသော် အပစ်အခတ်ရပ်စဲရေး ရှည်ကြာ လေလေ စစ်အာဏာရှင်စနစ် ခိုင်မြဲလေလေ ဖြစ်သောကြောင့် ပင်။

သာဓကတခု ပြပါမည်။

ရှစ်လေးလုံးအပြီး ရှမ်းပြည်တောင်ပိုင်း တောင်တန်းများပေါ်၌ ကျောင်း သားတပ်တခုကို ဦးဆောင်ကာ လှုပ်ရှားလျှက်ရှိစဉ်အတွင်း စာရေးသူ သည် စစ်အစိုးရကို ဆန့်ကျင်တိုက်ပွဲဝင်လျှက်ရှိသည့် ကရင်နီလူမျိုး ပေါင်းစုံလွတ်မြောက်ရေး တပ်ဦးမှ စစ်ဦးစီးချုပ်ဖြစ်သူ ဗိုလ်မှုးချုပ်ထွန်း ကျော်နှင့် တွေ့ဆုံခင်မင်ခွင့်ရခဲ့သည်။ တောင်ကြောကြီးတခုအပေါ် နေရာယူလျှက် ရက်တချို့ကြာမျှ တော်လှန်ရေး တပ်များ အတူတကွ ပူးတွဲ စခန်းချ နားနေလျှက်ရှိစဉ် စကားပြောဆို အမြင်ဖလှယ်ခွင့်များ ရခဲ့သည်။ ဗိုလ်မှုးချုပ်ထွန်းကျော်သည် စစ်ရေးအရ ထက်မြက်သူဖြစ်ပြီး ထိုစဉ်က စစ်ပွဲတပွဲ တိုက်ရုံမျှနှင့် ရန်သူ့ထံမှ လက်နက် ၁၈လက်ရ အောင် တိုက်ပြနေခဲ့သူဖြစ်သည်။ တော်လှန်ရေးသမားကောင်းတဦးဘဲဟု မိမိစိတ်တွင် သတ်မှတ်ခဲ့ဘူးသည်။

သို့ရာတွင် နှစ်တချို့ကြာပြီးနောက် အပစ်အခတ်ရပ်စဲရေးများ ခေတ်စား လာသောအခါ ကလလတ သည်လည်း အပစ်ရပ်အဖွဲ့အစည်း စာရင်းဝင် ဖြစ်သွားခဲ့သည်။ ဤတွင် န၀တ စစ်အစိုးရက ကလလတ စစ်ခေါင်း ဆောင်များအား စီးပွားရေးလုပ်ငန်းများဖြင့် မြှုဆွယ်ပြီး စစ်ဘက်နှင့် နိုင်ငံရေး ခွဲပါတော့သည်။ ယခုဆိုလျှင် ဗိုလ်မှုးချုပ်ထွန်းကျော်မှာ မြို့ပေါ်၌ အကြီးအကျယ် ကြီးပွားချမ်းသာနေပြီဖြစ်ကြောင်း ကြားရသည်။ ၄င်း တဦးအနေဖြင့် ဘ၀လွတ်မြောက်ရေးနှင့် ငြိမ်းချမ်းမှု ရသွားခဲ့ပါပြီ။ စစ်အာဏာရှင်စနစ်ကို မထိပါးသမျှကာလပတ်လုံး ၎င်းအား လက်ရှိ စစ်အစိုးရက ရန်ရှာမည် မဟုတ်တော့ပါ။

ဗိုလ်မှုးချုပ်ထွန်းကျော်မျှော်မှန်းတိုက်ပွဲဝင်ခဲ့သည့်ကရင်နီ လူထုကြီးလွတ် မြောက်ရေး၊ ကရင်နီလူထုအနေဖြင့် ရသင့်ရထိုက်သည့် ကိုယ်ပိုင် ပြဌာန်း ခွင့်အပေါ် အခြေခံသည့် ငြိမ်းချမ်းမှုရရေးမှာမူ ဝေလာဝေးနေဆဲဖြစ် သည်။ လုံခြုံမှုမှာ ကျီးလန့်စာစားနေရဆဲဖြစ်သည်။ စီးပွားရေး အခွင့် အလမ်းအရဆိုလျှင် အနိမ့်ဆုံး ကလေးပင် မရသေးပါ။ ကရင်နီပြည်နယ် လောပီတမှ ရေအားလျှပ်စစ် အကြီးအကျယ်ထွက်ပြီး မြန်မာနိုင်ငံ အတွင်းရှိ မြို့ပြဒေသများ (အထူးသဖြင့် စစ်အာဏာရှင်စနစ် ယန္တယား ပိုမိုလည်ပတ်စေမည့် နေရာများတွင်) အဓိကထားသုံး နေသည့်အချိန်၌ ယင်းသယံဇာတ ပစ္စည်း၏ ပိုင်ရှင်ကရင်နီလူထုကြီး နေထိုင်သည့် ကျေးရွာများမှာ ယနေ့အထိ လျှပ်စစ်မီးမရကြသေးပါ။

ဤသည်မှာ စစ်အစိုးရအဆက်ဆက် ယနေ့တိုင် နှစ်ပေါင်း ၂၀ ကျော် ဖေါ်ဆောင်ဆဲဖြစ်သည့် အပစ်အခတ် ရပ်စဲရေး အဓိက ငြိမ်းချမ်းရေး လုပ်ငန်းစဉ်၏ အကျိုးဆက်ဖြစ်သည်။

ငြိမ်းချမ်းရေးအတွက် နိုင်ငံရေးအရ တွေ့ဆုံဆွေးနွေးရေး ပေါ်ပေါက် စေရန် တိုင်းရင်းသားတပ်ပေါင်းစုများ၏ ကြိုးပမ်းမှုများ

စစ်အစိုးရက ကချင်အမျိုးသား အစည်းအရုံး ကေအိုင်အိုကို ဖိတိုက်နေစဉ် (နောက်ပိုင်းတွင် အက်စ်အက်စ်ပီပီ ရှမ်းအဖွဲ့နှင့်ပါ တိုက်ပွဲများ ဖြစ်လာ) ကျန်သည့် တိုင်းရင်းသား အဖွဲ့အစည်းကြီးများက ကေအိုင်အိုကို နိုင်ငံ ရေးအရ ၀န်းရံရေးမှာ မလုပ်မဖြစ် လုပ်ဆောင်ရမည့်လုပ်ငန်း ဖြစ်လာ သည်။

တပြည်လုံးအပစ်အခတ်ရပ်စဲရေးတောင်းဆိုထားသည်ကို ဦးသိန်းစိန် အစိုးရက မျက်ကွယ်ပြုလျှက်ရှိခြင်း၊ ကေအိုင်အိုအပေါ် ဆက်လက် ထိုးစစ်ဆင်နေခြင်း၊ များအားထောက်ပြလျှက် ညီညွတ်သော တိုင်းရင်း သားလူမျိုးများ ဖက်ဒရယ်ကောင်စီသည် ၂၀၁၂ ခုနှစ် ဇူလိုင်လ (၂၂) ရက်နေ့တွင် ၄င်းတို့၏နိုင်ငံရေးရပ်တည်ချက်ကို ထုတ်ပြန်ကျေငြာခဲ့ သည်။ ယင်းမှာ ၂၀၀၈ ဖွဲ့စည်းပုံကို လက်ခံ၊ နိုင်ငံရေးပါတီထောင်၊ ရွေး ကောက်ပွဲဝင်၊ လွှတ်တော်အတွင်း၌အများစုဆန္ဒမဲဖြင့် ဖွဲ့စည်းပုံကို ပြင် ဆင်သွားရန်ဟူသည်ကို လက်မခံနိုင်ကြောင်း၊ အဘယ်ကြောင့်ဆိုသော် လွတ်လပ်မှုနှင့် တန်းတူညီမျှမှု အပေါ်အခြေခံလျှက် ဆွေးနွေးညှိနိုင်း အဖြေရှာမှု မဟုတ်၍ဖြစ်ကြောင်း ဟူ၍ဖြစ် သည်။

ထို့အပြင် ကေအဲန်ယူက အဖွဲ့ဝင်တဖွဲ့အဖြစ် ပါဝင်လျှက်ပင်ရှိသော တိုင်းရင်းသားလူမျိုးများကောင်စီက ၂၀၁၂ခုနှစ်၊ စက်တင်္ဘာလ (၂၂) ရက်နေ့တွင် အောက်ပါအတိုင်းကြေငြာချက်ထုတ်ကာ စစ်အစိုးရနှင့် ထိတွေ့ဆက်ဆံမှုများ အားလုံးကို ဆိုင်းငံ့ရန် တိုက်တွန်းလိုက် သည်။ “သမတ ဦးသိန်းစိန် အနေဖြင့် ကချင်ပြည်၌ ထိုးစစ်ဆင်တိုက်ခိုက်မှုများ ရပ်တန့်ရန် အမိန့်ထုတ်ပြန်ခဲ့သော်လည်း မြန်မာစစ်တပ်က ဆက်လက် ထိုးစစ်ဆင်တိုက်ခိုက်မှုများ ပြုလုပ်နေခြင်းကို ရပ်ဆိုင်းရန် တောင်းဆို သည်။ ဤကဲ့သို့ ကချင်ပြည်၌ ထိုးစစ်ဆင်တိုက်ခိုက် မှုများ ဆက်လက် ပြုလုပ်ပါက အပစ်အခတ်ရပ်စဲရေး သဘောတူညီ ထားသော တိုင်းရင်း သားတော်လှန်ရေး လက်နက်ကိုင်အဖွဲ့များ အနေဖြင့် ပြည်ထောင်စု အစိုးရနှင့် ထိတွေ့ဆက်ဆံမှုများ အားလုံးကို ဆိုင်းငံ့ရန် တိုင်းရင်းသား လူမျိုးများကောင်စီက တိုက်တွန်းသည်။”

ကေအဲန်ယူ ပါဝင်လျှက်ရှိသော တိုင်းရင်းသား တပ်ပေါင်းစုကြီးများက ၂၀၀၈ ဖွဲ့စည်းပုံအခြေခံဥပဒေကို ဆန့်ကျင်ပြီး ပြည်တွင်းငြိမ်းချမ်း ရေး အတွက် စစ်မှန်သည့် နိုင်ငံရေးဆွေးနွေးပွဲများ ပေါ်ပေါက်လာအောင် စုပေါင်းဖိအားပေး နေသည့်အချိန်မှာပင် ကေအဲန်ယူ၏ တပ်မ ဟာ ဆက် ဆံရေးရုံး ဟူသည်များ တခုပြီးတခု ပေါ်လာနေလျှက်ရှိသည်။ ယင်းကို ကြည့်ခြင်းဖြင့် ကေအဲန်ယူအတွင်း၌ တခုခုတော့ အမှား အယွင်းဖြစ်နေပြီ ဟူသည်ကို မြင်နိုင်သည်။

ကေအဲန်ယူ နှစ်ဖွဲ့ကွဲသွားစေရန် ဦးသိန်းစိန်ဦးဆောင်သည့် စစ်အစိုးရက သတ်သျှိုဖြိုခွဲသလား။

ဤသည်ကို ပြောရခက်ခဲ့ပါသည်။ ပြီးခဲ့သော စစ်အစိုးရများ အဆက် ဆက် နှစ်ပေါင်း ၂၂နှစ်ကျော်ကြာ အပစ်အခတ် ရပ်စဲခဲ့သည့် ဖြစ်စဉ် များအတွင်း သပ်လျှိုဖြိုခွဲမှုများ တွေ့ခဲ့သဖြင့် ယခု ကေအဲန်ယူကိစ္စ တွင်လည်း အလားတူ ခန့်မှန်းနိုင်သည်။ သို့ရာတွင် အတိအကျ မပြောနိုင်ခဲ့ပါ။
ယခု သံသယဖြစ်ဘွယ် အချက်တရပ်ပေါ်လာပါပြီ။ အောက်တိုဘာလ (၁၁)ရက်နေ့နံက် လွတ်လပ်သော အာရှအသံနှင့် တွေ့ဆုံ မေးမြန်းခန်း၌ ငြိမ်းချမ်းရေးဝန်ကြီး ဦးအောင်မင်းက ကေအဲန်ယူကို ရည်ညွှန်းကာ အောက်ပါအတိုင်း ပြောသွားခဲ့သည်။

(ဤလင့်ခ် တွင် နားဆင်ပါ။ https://docs.google.com/open?id=0BzC8VZhwp11ASUthY0JzOVFVZW8 )

“နိုင်ငံရေးအဖွဲ့နဲ့ စစ်ရေးအဖွဲ့ နှစ်ခုရှိတာပေါ့ဗျာ။ စစ်ရေးအဖွဲ့က ငြိ်မ်းချမ်းရေးကို မြန်မြန်သွားချင်တယ်။ နိုင်ငံရေးအဖွဲ့ကတော့ ငြိမ်းချမ်း ရေးကို တဆင့်ပြီးတဆင့် သွားချင်တယ်။”

ဘယ်လိုပါလိမ့် ၀န်ကြီးမင်း။ ဒါဟာ ကေအဲန်ယူကို နှစ်ခြမ်းခွဲလိုက်တာ မဟုတ်ဘူးလားဟု မေးစရာပင် မလိုတော့ပါ။ ကေအဲန်ယူကွဲမှာ စိုးရိမ်၍ ကေအဲန်ယူ၏ သမိုင်းအစဉ်အလာ၊ နိုင်ငံရေးရပ်တည်ချက်၊ ဖက်ဒရယ် ပြည်ထောင်စု တည်ဆောက်ရေးမူ၊ ကိုယ်ကျိုးစွန့်သည့် လုပ်ဟန်တို့ကို လေးစားတန်ဘိုးထားသော လူထုများနှင့် မဟာမိတ်အဖွဲ့အစည်းများက ၀ိုင်းဝန်းအကြံပေးကြ၊ အားပေးကြ၊ ၀န်းရံကြ လုပ်နေကြခြင်းဖြစ်သည်။

ဦးအောင်မင်းထိုသို့ ပြောနေသည့် နေ့ရက်အထိ ကေအဲန်ယူသည် နှစ်ဖွဲ့မကွဲခဲ့ပါ။ နိုင်ငံရေးအဖွဲ့နှင့် စစ်ရေးအဖွဲ့ နှစ်ခုဆိုသည်မှာ လုံးဝ မမှန်ပါ။ ကေအဲန်ယူသည် တခုတည်းသာရှိသည်။ ကရင့်အမျိုးသား လွတ်မြောက်ရေး တပ်မတော်သည် တခုတည်းသော ဗဟို ကော်မတီ၏ ဦးဆောင်မှုအောက်မှာပင် ယနေ့အထိ ရှိနေဆဲဖြစ်သည်။

ယင်းကို မျက်ကွယ်ပြုလျှက် နိုင်ငံရေးအဖွဲ့နှင့် စစ်ရေးအဖွဲ့ နှစ်ခုရှိသည် ဟု ၀န်ကြီးဦးအောင်မင်းက ပြောလိုက်ခြင်းမှာ ကွဲနေပြီဟု ၎င်း ကိုယ်တိုင် က အများသိအောင် ကြေငြာလိုက်ခြင်းမဟုတ်ဘူးလား။ ဦးအောင်မင်း သည် မီးကလေးတစအား တောမီးကြီးဖြစ်အောင် မလုပ် သင့်ပါ။ စစ်ရေး အဖွဲ့က ငြိမ်းချမ်း ရေးကို မြန်မြန်သွားချင်တယ်ဟူ၍ သုံးလိုက်ခြင်းဖြင့် လည်း ငြိမ်းချမ်းရေးကိစ္စ၌ စစ်ရေးအဖွဲ့က ရှေ့မှာ ရောက်နေပြီး အတက် ကြွဆုံးလုပ်နေသည့်သဘော ပြောလိုက်ခြင်းဖြစ်သည်။ အများထင်ယောင် မှားအောင် ကြေငြာလိုက်ခြင်းဖြစ်သည်။ အချက်အလက်အရ လုံးဝပင် လွဲမှားနေသည်။ ကေအဲန်ယူ ဗဟိုကော်မတီ သည် ငြိမ်းချမ်းရေးကို အတက်ကြွဆုံးတောင်းဆိုလာခဲ့သည်မှာ နှစ်ပေါင်းကြာလှပါပြီ။ မှတ်မိ သမျှနှစ်ခု ထောက်ပြ ပါမည်။

တခုက ကေအဲန်ယူ ဥက္ကဌ ဗိုလ်ချုပ်ကြီးမြက ၁၉၉၀ခုနှစ်တွင် ကေအဲန်ယူ ပါဝင်ဖွဲ့စည်းထားသည့် မြန်မာပြည်ဒီမိုကရက်တစ် မဟာမိတ် အဖွဲ့ချုပ် ကို ဦးဆောင်ခဲ့စဉ်က ငြိမ်းချမ်းရေးအတွက် ဆွေးနွေးရန် စစ်အစိုးရကို ကမ်းလှမ်းခဲ့ဘူးသည်။ ထို့နောက် ကွယ်လွန်သူ ဖဒိုစော ဘသင် ဥက္ကဌအဖြစ် ဆောင်ရွက်ခဲ့စဉ် ကလည်း ငြိမ်းချမ်းရေး ဆွေးနွေးပွဲများ ကျင်းပရန် စာနှင့်ရေးကာ ကမ်းလှမ်းခဲ့ဘူးသည်။ ယင်းတို့မှာ ကေအဲန် ယူ၏ နိုင်ငံရေးက ဦးဆောင်နေတာ မဟုတ်ဘူးလား။ ယခုလည်း စစ်ဦးစီး ချုပ်ဗိုလ်ချုပ်ကြီး မူတူးဆေးဖေါနှင့်အဖွဲ့ကို အပစ်အခတ် ရပ်စဲရေးဆွေး နွေးပွဲသို့ ကေအဲန်ယူတခုလုံး၏ နိုင်ငံရေးကို ဦးဆောင်နေသည့် လက်ရှိ အမှုဆောင်ကော်မတီက စေလွှတ်ခြင်း မဟုတ် ဘူးလား။ ယင်းသို့ဖြစ်ပါ လျှက် “စစ်ရေးအဖွဲ့က ငြိမ်းချမ်းရေးကို မြန်မြန်သွားခြင်တယ်” ဟူ၍ ကရင်လူထုနှင့် အောက်ခြေတပ်ထုများ ထင် ယောင်ထင်မှားဖြစ်အောင် ဦးအောင်မင်း ဘာကြောင့် ပြောနေပါသနည်း။

ပို၍ဆိုးသည်မှာ အောက်ပါစကားလုံးကို သုံးသွားခြင်း ဖြစ်သည်။

“သူတို့နှစ်ဖွဲ့တွေ့ဆုံဆွေးနွေးချင်တယ် ဆိုရင်လဲ ရန်ကုန်မှာလား ဘန်ကောက်မှာလားသူတို့ဆွေးနွေးချင်တဲ့ နေရာမှာ ဖြစ်အောင် စီစဉ် ပေးပါမယ်။”

ယင်းအပြောအရ ရှင်းနေသော အချက်မှာ ကေအဲန်ယူနှစ်ဖွဲ့ ရှိသည့် အနက် နှစ်ဖွဲ့လုံးကို ဆက်ဆံသွား မည်ဟူ၍ ကြိုတင် မီးစိမ်းပြလိုက် ခြင်း ဖြစ်သည်။ ကေအဲန်ယူကို စည်းလုံးညီညွတ်စေခြင်ရင် နှစ်ဖွဲ့တွေ သုံးဖွဲ့ တွေ ပြောနေစရာ အကြောင်းမရှိပါ။ ကေအဲန်ယူ၏ လေးနှစ် တကြိမ် ညီလာခံမှ တရားဝင် ရွေးချယ်တင်မြှောက်ထားသော ကြီးငါးကြီး ခေါင်း ဆောင်သည့် ဗဟိုအလုပ်အမှုဆောင်ကော်မတီနှင့်ဖြစ်စေ၊ ၎င်းတို့က တာဝန်ပေးစေလွှတ်လိုက်သည့် ကိုယ်စားလှယ်အဖွဲ့နှင့်ဖြစ်စေ ဆက်ဆံ သွားရန်သာ ရှိသည်။

ဦးအောင်မင်းသည် ကေအဲန်ယူကို စည်းလုံးညီညွတ်စေချင်ရုံသာမက ပြည်ထောင်စုတခုလုံးအတွက် ထာဝရ ငြိမ်းချမ်းရေးကို မရောက် ရောက် အောင် သွားချင်သည်ဟုဆိုလျှင် တပြည်လုံး အပစ်အခတ်ရပ်စဲရေးကို ချက်ချင်းကျေညာကာ နိုင်ငံရေးအင်အားစုအားလုံးကိုပါ ဖိတ်ခေါ်လျှက် နိုင်ငံရေးဆွေးနွေးမှုများ အမြန်ဆုံးဖေါ်ဆောင်ရန်သာ ရှိသည်။ သို့မဟုတ်ပါက ဦးအောင်မင်းသည် အပြောတမျိုး၊ အလုပ် တမျိုးလုပ်ပြီး စစ်အာဏာရှင်စနစ် သက်ဆိုးရှည်စေရန်သာ ပံ့ပိုးပေးနေသည်ဟု သုံးသပ်ရပါမည်။

အပိုင်း(၅)ကို ဆက်လက်ဖတ်ရှုပါရန်

အောင်ထူး (ရှေ့နေ)
၂၀၁၂ခုနှစ်၊ အောက်တိုဘာလ (၁၅)ရက်။