Wednesday, December 4, 2013

၁၀ရာနှုန်းသာ အကျိုးခံစားခွင့် ရှိသည့် အစိုးရ၏ ကားပါမစ် ထောက်ပံ့ရေးအစီစဉ်

(ရွှေဟင်္သာသတင်းဌာန)

အပစ်အခတ် ရပ်စဲရေး အဖွဲ့အစည်းများ အတွက် အစိုးရမှ ထောက်ပံ့သော ကားပါမစ် အစီစဉ်သည် တရားဝင် အခွန်လွတ်သော စနစ် ဖြစ်စေလိုကြောင်း အစိုးရနှင့် အပစ်အခတ် ရပ်စဲထားသည့် ကရင့်ငြိမ်းချမ်းရေး ကောင်စီ(KNLA/PC) မှ ဗိုလ်မှူးချုပ် ဒေါက်တာ တိမိုတေ (Ti Mo Thy) မှ ဆိုပါသည်။

အစိုးရက အဖွဲ့အစည်းတွေကို ကားပါမစ် ပေးပြီး ထောက်ပံ့တယ် ဆိုတာက ကောင်းပါတယ်။ ကျေးဇူးလည်း တင်ပါ တယ်။ ဒါပေမဲ့ အစိုးရက အခွန် (၆၀)ရာနှုန်း၊ ငွေစိုက်သူ ကုန်သည်က (၃၀)ရာနှုန်းနဲ့ အမည်ခံတဲ့ အဖွဲ့အစည်းက (၁၀)ရာနှုန်း မျိုးပေးနေမှတော့ သိပ်ထူးမယ် မဟုတ်ဘူးလို့ ပြောချင် ပါတယ်။ ဖြစ်သင့်တာက အခွန်လွတ် ပေးရင်သင့် တော်မယ်လို့ အဆိုပြုချင် တာပါ။ဟုဆိုပါ သည်။


အစိုးရသည် (KNLA/PC) အား (၂၀၀၇)ခုနှစ်က တကြိမ် နှင့် (၂၀၁၃) ခုနှစ် ဖေဖေါ်ဝါရီလ တွင်တကြိမ် နှစ်ကြိမ် ကားပါမစ် အစီးရေ (၈၀)ခန့် ပေးခဲ့ပါသည်။ ဤအထဲတွင် (KNLA/PC) အတွက် လက်တွေ့ ခံစားခွင့် ရှိသည်မှာ (၁၀)ရာနှုန်း ဖြစ်သည့် ကား(၈) စီးသာ ရရှိခဲ့သဖြင့် မြင်သာသည့် အခွင့်အရေး မဟုတ်ဘဲ အမည်ခံ သဘော လောက်သာ ထောက်ပံ့ ခဲ့သည်ဟု ဆိုရမည် ဖြစ်ပါသည်။

ဤသို့ကြောင့် အဖွဲ့အစည်း အား အမည်ခံ သဘောသာ ထောက်ပံ့ပေး သည်ဟု ဆိုနေခြင်း ဖြစ်ပါသည်။ အကယ်၍ အခွန်လွတ် ပေးပါက သင့်တော် မည်ဖြစ်ကြောင်း (KNLA/PC) မှ အဆိုပြုနေခြင်း ဖြစ်ပါသည်။ ဤနည်းသည် ယခုမှ စတင်ခဲ့ခြင်း မဟုတ်ဘဲ (၁၉၉၄) ခုနှစ် အပစ်အခတ် ရပ်စဲခဲ့စဉ် ကလည်း တိုင်းရင်းသား အဖွဲ့များအား ထောက်ပံ့ပေး ခဲ့သည့် နည်းဖြစ်ပါသည်။

ထို့အပြင် (KNLA/PC)သည် အစိုးရအား ကားပါမစ်အပြင် ဒေသဖွံ့ဖြိုးရေး အကူအညီများ ပေးသင့် ကြောင်းဆိုပါသည်။  (KNLA/PC) အတွက် ကားပါမစ်များသည် ကရင်အမျိုးသား ကျောင်းဆရာ များ၏လစာများ နှင့် စိုက်ပျိုး၊ မွေးမြူရေးသင် တန်းကျောင်းများ၏ စရိတ်အတွက်သာ ဖူလုံခဲ့သည် ဟုဆိုပါသည်။

ဒေသဖွံ့ဖြိုးရေး လုပ်ငန်းများ ပေးမည်ဆိုပါက  လမ်းပန်း ဆက်သွယ်ရေး ပိုမိုကောင်းမွန် စေခြင်း၊ လယ်ယာမြေ စိုက်ပျိုးရေး စနစ်ဖွံ့ဖြိုးရေး၊ ခရီးသွားလုပ်ငန်း၊ ကုန်သွယ်မှုနှင့် ထုတ်ကုန် တိုးတက်သော လုပ်ငန်းများ အတွက် အကူအညီ ပေးသင့်ကြောင်း အဆိုပြုထားပါသည်။

အစိုးရသည် အပစ်ရပ်သော တိုင်းရင်းသား အဖွဲ့များအား အင်အားအပေါ် မူတည်ပြီး ၄င်းအချိုးနှင့် ညီမျှသော ကားပါမစ်များကို ပေးခဲ့ကြောင်း ဆိုပါသည်။ အကူအညီ ပေးရာတွင်လည်း အဖွဲ့အစည်းတိုင်း အား ကုမ္ပဏီဖွဲ့စေပြီး ကုမ္ပဏီ နည်းဥပဒေ အရဖြင့် အကူအညီ ပေးနေခြင်း ဖြစ်ကြောင်း တိုင်းရင်းသား အဖွဲ့အစည်းများ အတွက် အထူးအခွင့် အရေးပေးသည့် အနေဖြင့် အကူအညီ ပေးနေခြင်း မဟုတ်ကြောင်း ဆိုပါသည်။

ဤနေရာတွင်လည်း ကုမ္ပဏီအရ ပေးခြင်းထက် အဖွဲ့အစည်းနှင့် ဒေသဖွံ့ဖြိုးရေးကို ရည်ရွယ်ပြီး ဖွံ့ဖြိုးရေး စီမံကိန်းများ ချပေးသင့်ကြောင်း အဆိုပြုခဲ့ပါသည်။ အစိုးရ ငြိမ်းချမ်းရေး ဖေါ်ဆောင်ရေး လုပ်ငန်း ကော်မီတီဖက်ကမူ တိုင်းရင်းသား လက်နက်ကိုင် အဖွဲ့များနှင့် ပြည်ထောင်စု အဆင့် ဆွေးနွေးပွဲများ ကျင်းပပြီး ဒေသဖွံ့ဖြိုးရေး လုပ်ငန်းများ ဆောင်ရွက်ရန် သဘောတူ ထားခဲ့ပါသည်။

သို့သော်  သဘောတူ ထားသည့် အပစ်အခတ် ရပ်စဲရေး ကိစ္စ၊ နိုင်ငံရေး ဆွေးနွေးပွဲ ကိစ္စနှင့် ဒေသဖွံ့ဖြိုးရေး ကိစ္စများကို လျှစ်လျူရှု ခဲ့ပါသည်။ ဤသို့ကြောင့် (KNLA/PC) တောင်းဆိုသော ဒေသဖွံ့ဖြိုးရေး အကူအညီများ ရရှိနိုင်လိမ့်မည် မထင်ကြောင်း ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) အဖွဲ့ဝင်များကလည်း သုံးသပ်ထား ပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။