Monday, February 16, 2015

ရဲဘော်သစ်ဆင့်ခေါ်မှုကြောင့် ဒေသခံ ရာကျော်နေရပ်မှ စွန့်ခွါ

(သျှမ်းသံတော်ဆင့်)

သျှမ်းပြည်တောင် ပိုင်း မိုင်းကိုင်မြို့နယ် အတွင်း ဒေသခံများအား သျှမ်းပြည် တပ်မတော် RCSS/SSA မှ တပ်သား သစ်ကောက်ယူ စုဆောင်းမှုကြောင့် ဒေသခံ ရာကျော်နေရပ်မှ စွန့်ခွါနေရကြောင်း မိုင်းကိုင်ဒေသခံ များပြောပြချက်အရသိရသည်။

သျှမ်းပြည်တောင်ပိုင်း မိုင်းကိုင်မြို့နယ် မြို့ပေါ် ရပ်ကွက် ၉ ခု နှင့် မြို့ပြင် ကျေးရွာအုပ်စု များအား သျှမ်းပြည်တပ်မတော် RCSS/SSA  တပ်သားသစ် ဆင့်ခေါ် စုဆောင်းမှုကြောင့် ဒေသတွင်းလူငယ်များသည်  လဲချားမြို့၊ တောင်ကြီးမြို့၊ ပင်လုံမြို့နှင့် ထိုင်းနိုင်ငံသို့ ထွက်ပြေး တိမ်းရှောင်နေရသည်ဟု  ဒေသခံများက ပြောသည်။


“ကျနော်တို့ မြို့ပေါ် ရပ်ကွက် ၇ ခု ဟိုနားကျေးရွာအုပ်စု၊ ဝမ့်ဖွီး ကျေးရွာ အုပ်စု  တုံလော အုပ်စု တွေမှာ နာမည်စာရင်းက တအုပ်စု ၅၀ လောက်ရှိမယ်။ နာမည်စာရင်းပါတဲ့ လူတွေ ဝမ့်ဖွီး ဘုန်းကြီးကျောင်းမှာRCSS/SSA အမှတ် ၉ ဌာနေ တာဝန်ခံနဲ့ သွားတွေ့တယ်။တောင်း ပန်တယ် မရဘူး၊ နာမည်စာရင်းပါ တဲ့ သူအားလုံး စစ်မှု လာထမ်း ရမယ်လို့ဘဲပြောနေတာ။  မတတ်နိုင်ဘူး။ ပိုက်ဆံရှိတဲ့သူတွေတော့ လူငှား ပြီး လွှတ်တာဘဲ” - ဟု မိုင်းကိုင်သား ဦးစိုင်းအိုက်န က ပြောသည်။


အမည်မဖေါ်လိုသည့် ဒေသတွင်း ဆရာတော်တပါးက ‘ အမျိုးသားရေးလုပ်ငန်းဆိုတာ အား လုံးက ဝိုင်းလုပ်ရမယ့် တာဝန် ရှိတယ်။ ဝိုင်းလုပ်ချင်စိတ်ရှိလာအောင်လည်း စည်းရုံးရမယ်။  အာဏာသုံးပြီးဆင့်ခေါ်ရင်တော့  လူကိုသာရပြီး သူ့ရဲ့နှလုံးသား နဲ့ သူ့ရဲ့ နောက်ခံမိသားစု ပံ့ပိုးမှု မရရင်တော့ ရည်မှန်းချက်ပန်းတိုင်ဆီကို ဘယ်တော့မှ ရောက်နိုင်မှာမဟုတ်ဘူး။ မေတ္တာတရား ရှေ့ထားပြီးအလုပ်လုပ်ကြစေလိုတယ်’ - ဟု မိန့်ကြားတော်မူပါသည်။


အဆိုပါကိစ္စ နှင့်ပတ်သက်၍ မိုင်းကိုင်မြို့နယ် အုပ်ချုပ်ရေး အထောက် အကူပြု ဥက္ကဌ စိုင်းလုံ နှင့် အဖွဲ့က သျှမ်းပြည်တပ်မတော် RCSS/SSA ငြိမ်းချမ်းရေးကိုယ်စားလှယ် အဖွဲ့ခေါင်းဆောင် ဗိုလ်မှူးချုပ် ပေါင်ခေး နှင့် ဖေဖေါ်ဝါရီ ၁၅ ရက်နေ့က တွေ့ဆုံဆွေးနွေးရာ  ဗိုလ်မှူးချုပ်ပေါင်ခေးက-


“အခု အဓမ္မ တပ်သားသစ်စုဆောင်းတယ်ဆိုတာ အထက်အမိန့်မဟုတ်ဘူး။ ကျနော်တို့မှာ အဲဒီလိုပေါ်လစီလဲ မရှိတော့ဘူး။ နားလည်မှု တခုခု လွဲတယ်လို့ဘဲထင်တယ်။ ကျနော်တို့ ကြပ်မတ်စစ်ဆေးပေးသွားပါမယ်” - ဟုပြောကြား ခဲ့ ကြောင်း ဒေသခံများကပြောသည်။


“အသက် ၁၈ နှစ်ပြည့် သျှမ်းပြည်သားတိုင်း စစ်ပညာ တတ်မြောက်ရမည်ဆိုတဲ့ ပေါ်လစီ တော့ရှိတယ်။ လိုအပ်ရင်အသုံးပြုဖို့  လပိုင်းစစ်သင်တန်းပေးတာတွေရှိတယ်။ စစ်သင်တန်း ပြီးရင် အိမ်ပြန်ပြီး မိဘအလုပ်ပြန်ကူလုပ်ဖို့ ပြန်လွှတ်ပေးတယ်။ စစ်ထဲမှာဘဲ ဆက်နေ ချင် ရင် လည်း ရတယ်။ ဒါလည်း တွေ့ဆုံ စည်းရုံးပြီးမှ ခေါ်လာတာ။ အဓမ္မ ခေါ်ယူတာမရှိ ဘူး။ တကယ်လို့အထက်အမိန့်မရဘဲ စစ်သားကောက်တာတို့ အမိန့်ကျူးလွန် တာတို့ရှိခဲ့ရင် အဲဒီလူအပြစ်ရှိတယ်။ ခေါ်ယူစစ်ဆေးပြီး ပြစ်ဒဏ်ပေးရ ပါလိမ့် မယ်” – ဟု RCSS/SSA ခေါင်းဆောင် ဒု-ဗိုလ်ချုပ်ကြီးယွက်စစ်က သျှမ်းသံတော်ဆင့်အားပြောဖူးသည်။


ဒုတိယ ဗိုလ်ချုပ်ကြီးယွက်စစ် အပါအဝင် သျှမ်းပြည်တပ်မတော် RCSS/SSA  ကိုယ်စား လှယ် နှင့် အဖွဲ့ သည် ပြည်ထောင်စုနေ့ နှင့် ငြိမ်းချမ်းရေးလက်မှတ်ထိုးပွဲတက်ရောက်ပြီး သျှမ်း ပြည်တွင်းဒေသခံလူထုနှင့်တွေ့ဆုံနေပါသည်။


သီးခြားအတည်ပြုချက်မရသေးသည့်သတင်းရ RCSS/SSA  ခေါင်းဆောင်သည်  တောင်ကြီး ခရိုင်အတွင်း လှည့်လည် ပြီး ရက်ပိုင်းအတွင်း သျှမ်းပြည်တောင်ပိုင်း အလယ်ပိုင်းဘက် ခရီးထွက်ကာ ဒေသခံ လူထုနှင့် တွေ့ဆုံမည်ဟု ဆိုပါသည်။

ဓါတ်ပုံ - ရဲဘော်သစ်ဆင့်ခေါ်စာ

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။