Saturday, August 10, 2013

အရေးပေါ် အခြေအနေအလွန် လားရှိုး

(Irrawaddy)

ဘာသာရေး၊ လူမျိုးရေး အမြင်မတူရာကနေ ပဋိပက္ခတွေ ဖြစ်ပွားခဲ့ဖူးတဲ့ ရှမ်းပြည်နယ် မြောက်ပိုင်း လားရှိုးမြို့ကြီးမှာ အခြေအနေတွေ ပုံမှန်ပြန်ဖြစ်နေလို့ ဇူလိုင် ၂၇ ရက်နေ့က အရေးပေါ် ပုဒ်မ ၁၄၄ ပြန်လည် ရုပ်သိမ်းပေးခဲ့ပေမယ့် လက်ရှိ အချိန်အထိ ရဲလုံခြုံရေးတွေက နေ့ညမပြတ် နေရာအနှံ့အပြား ဆက်လက် စောင့်ကြပ်နေတာကို တွေ့ရပါတယ်။

လားရှိုး မြို့တော်ခန်းမနဲ့ ဘူတာကြီး အပါအဝင် လူစည်ကားရာ နေရာတချို့မှာတော့ မြို့ဒေသခံတွေကို လုံခြုံရေးနဲ့ တရားဥပဒေ စိုးမိုးရေးအတွက် ဝိုင်းဝန်းပူးပေါင်းကြဖို့ မေတ္တာရပ်ခံတဲ့ ဆိုင်းဘုတ်တွေ ချိတ်ထားပါတယ်။ ပဋိပက္ခ ဖြစ်ပွားစဉ်က မီးလောင်ကျွမ်း ခဲ့တဲ့ ရပ်ကွက် ၂ ရဲ့ ဗလီကြီးကတော့ ရှေ့မျက်နှာစာတွေမှာ သံပန်းသံတံခါး ပြန်လည် တပ်ဆင်တာ၊ ဗလီအတွင်း ပြင်ဆင်မှုတွေ လုပ်နေကြပြီး ပုံမှန် အတိုင်း ဝင်ထွက် သွားလာတာ၊ ဝတ်ပြု ဆုတောင်းတာတွေ ပြန်လည် ပြုလုပ်နေကြပါပြီ။

 
ဗလီရှေ့မှာရှိတဲ့ မွတ်စလင် ဆိုင်ငယ်လေးတွေ ပြန်လည် ဖွင့်လှစ်ထားတာ တွေ့ရပေမဲ့ ဗလီရဲ့ အရှေ့မျက်နှာစာ မှာတော့ ရဲလုံခြုံရေး ၅ ဦးက နေရာခွဲပြီး စောင့်ကြပ်နေပါတယ်။

ပျက်စီးခဲ့တဲ့ ဗလီကို ပြန်လည် ပြင်ဆင်ဖို့အတွက် အစ္စလမ် ဘာသာဝင်အသင်းက တာဝန်ယူနေပြီး အစိုးရဘက်က အထောက်အပံ့ အနည်းငယ် ရတယ်လို့ လားရှိုးမြို့ ဒေသခံ ဦးမင်းသူက ဆိုပါတယ်။
မီးလောင်ကျွမ်းခဲ့တဲ့ မွတ်စလင် မိဘမဲ့ ကလေးများကျောင်းနဲ့ ရပ်ကွက် ၉ ဈေးလမ်း အတွင်းက တွဲလျှက်ရှိနေတဲ့ ဆိုင်ခန်း တွေကိုတော့ လက်ရှိအချိန်အထိ ချိတ်ပိတ်ထားပြီး “ကန့်သတ် နယ်မြေ၊ မကျူးကျော်ရ” ဆိုတဲ့ တားမြစ် ဆိုင်းဘုတ် ချိတ်ဆွဲထားဆဲပါပဲ။

လားရှိုး မြို့မဈေးကြီးကလည်း အရင်အတိုင်း ဆိုင်ခန်းတွေ ပြန်လည်ဖွင့်လှစ် ရောင်းချနေကြပေမယ့် တချို့ မျက်နှာစာတန်းမှာ ရှိတဲ့ ဆိုင်ခန်းတွေကတော့ ပြန်ဖွင့်တာ မရှိသေးပါဘူး။

ပုဒ်မ ၁၄၄ ရုပ်သိမ်းပေးပြီး ဖြစ်တာကြောင့် ညအချိန်တွေ ပြန်လည်ထွက်ခွင့် ပြုထားပေမယ့် ညဘက် ရောက်ပြီဆိုရင် လူနည်းစု လောက်သာ သွားလာ လှုပ်ရှားကြပါတယ်။ ဒေသခံတွေကတော့ ပဋိပက္ခ ဖြစ်ပြီးကတည်းက လက်ရှိအချိန်အထိ လုံခြုံရေး အခြေအနေ စိုးရိမ်လို့ ညဘက် ဆိုရင် အပြင် သိပ်မထွက်ကြတော့ဘူးလို့ ဆိုပါတယ်။

ဓာတ်ဆီ ဝယ်ရောင်း ပြုလုပ်ရာကနေ လားရှိုးမြို့ကြီးတခုလုံး လူမျိုးရေး၊ ဘာသာရေး အဓိကရုဏ်းအသွင် ဖြစ်ပွားခဲ့တာကြောင့် မြို့ပေါ်မှာ နေတဲ့ မွတ်စလင် တချို့ကတော့ သူတို့နေထိုင်တဲ့ အိမ်တွေကို ရောင်းချပြီး မြို့ပြောင်း၊ ရပ်ကွက်ပြောင်း သဘောမျိူး လုပ်သွားကြတာတွေ ရှိနေတယ်လို့ ဒေသခံတွေက ပြောပြပါတယ်။

“ပဋိပက္ခ ပြီးကတည်းက တချို့ မွတ်စလင်တွေက သူတို့အိမ်တွေကို ရောင်းပြီး ပြောင်းကုန်ကြတယ်။ စီးပွားရေး ရှိတဲ့ သူတွေ လည်း အဲဒီအတိုင်းပဲ၊ မွတ်စလင် အများစုကတော့ ရပ်ကွက် ၇ ဘက်ကို အိမ်ပြောင်းကြတာ” လို့ ရပ်ကွက် ၁၀ နယ်မြေ ၉ က ဒေသခံ ဒေါ်ကလျာက ဆိုပါတယ်။

ပဋိပက္ခဖြစ်တုန်းက ရပ်ကွက် ၁၀ နယ်မြေ ၉ မှာ ရှိတဲ့ မွတ်စလင် ဆိုင်ခန်းနဲ့ တွဲလျှက်ရှိတဲ့ အိမ်တလုံးကို လာရောက် ရန်ပြုတဲ့ သူတွေ ရှိခဲ့တာကြောင့် အဲဒီ အိမ်မှာနေတဲ့ မွတ်စလင် မိသားစုက အနီးအနားမှာရှိတဲ့ ဘုန်းကြီးကျောင်း တကျောင်းမှာ ခေတ္တ ခိုလှုံခဲ့ရတယ်လို့ သိရပါတယ်၊ ပဋိပက္ခတွေ ငြိမ်သွားပေမယ့် အဲဒီ မိသားစုကတော့ ဆိုင်ခန်းနဲ့အိမ်ကို ပြန်အပ်ပြီး အပြီး ပြောင်းသွား ခဲ့တယ်လို့ ဒေါ်ကလျာက ပြောပြပါတယ်။

ဒါ့အပြင် ပဋိပက္ခ ဖြစ်တုန်းက ဖျက်ဆီးခံခဲ့ရတဲ့ သီတာအေး ရုပ်ရှင်ရုံ၊ ဟိုတယ်နဲ့ လားရှိုးဓာတ်ပုံတိုက် အပါအဝင် အဆောက်အဦး တွေကိုတော့ ပြန်လည် ပြင်ဆင်ပြီး ဖွင့်လှစ်ထားတာ တွေ့ရပါတယ်။

“အရင်တုန်းက လားရှိုးမှာ ဘာသာရေး၊ နိုင်ငံရေး ဆိုတာမျိုးတွေ သိပ်မလုပ်ကြဘူး၊ အေးအေးဆေးဆေး နေကြတာများတယ်၊ အခု ပဋိပက္ခဖြစ်ပြီးမှ ဆိုင်ခန်းတွေ၊ ကားတွေနဲ့ တချို့ ဆိုင်ကယ်တွေမှာ ၉၆၉ စတစ်ကာတွေ ကပ်လာတယ်၊ ဦးဝီရသူ တရား တွေလည်း နေရာအတော်များများမှာ ဖွင့်လာကြတယ်” လို့ ရပ်ကွက် ၈ မှာ နေထိုင်တဲ့ ကိုကျော်မိုးဟိန်းက ဆိုပါတယ်။

လားရှိုးမှာ အခြေအနေတွေ မငြိမ်မသက်ဖြစ်တုန်း မန္တလေးဘက်က သံဃာတော်တွေက တရားစာတွေ ရွတ်ဖတ်ရင်း ရောက်လာတာကြောင့် နောင်ချိုဂိတ်မှာ ပိတ်ပြီး တားခဲ့တာက အခြေအနေကို ထိန်းသိမ်းရာ ရောက်ခဲ့ကြောင်း၊ သူကိုယ်တိုင် လည်း လားရှိုးမြို့ပြင် ဘက်ကို ကုမ္ပဏီ ပစ္စည်းတွေနဲ့ ဈေးကွက် အရောင်းထွက်ချိန် ဖြစ်နေတာကြောင့် မြို့တွင်း ပြန်ဝင်လို့ မရခဲ့ပေမယ့် မြို့တွင်းကို သံဃာတော်တွေ ရောက်လာပြီးမှ အခြေအနေတွေ ပိုရှုပ်ကုန်မှာ စိုးရိမ်ခဲ့တဲ့ အကြောင်း ကိုကျော်မိုးဟိန်းက ရှင်းပြပါတယ်။

လားရှိုးမြို့ အဓိကရုဏ်း စတင်ဖြစ်ပွားစေခဲ့တဲ့ မီးရှို့မှုကျူးလွန်သူ ဦးနေ၀င်းကို လားရှိုးမြို့နယ် တရားရုံးက ထောင်ဒဏ် ၂၆ နှစ် ချမှတ်လိုက်ပြီး အကြမ်းဖက်မှု ကျူးလွန်ပါဝင်ခဲ့သူ ၄၄ ဦးကို ဖမ်းဆီး ထိန်းသိမ်းခဲ့တယ်လို့ အစိုးရက သတင်း ထုတ်ပြန်ထား ပါတယ်။

လားရှိုး အဓိကရုဏ်းကြောင့် ဗလီ ၁ လုံး၊ ဘာသာရေးကျောင်း ၃ ကျောင်း အပါအ၀င်၊ လူနေအိမ်တွေ၊ ဈေးဆိုင်ခန်းတွေ ဖျက်ဆီး ခံခဲ့ရပြီး ကျပ် ၆၈၄ သိန်းကျော် ဆုံးရှုံးခဲ့ရတယ်လို့ ရှမ်းပြည်နယ် ပြန်ကြားရေးဌာနရဲ့ သတင်းထုတ်ပြန်ချက် အရ သိရှိရပါတယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။