Monday, May 20, 2013

RCSS နှင့်တိုက်ပွဲထပ်ဖြစ် အစိုးရတပ်မှ ၉ ယောက်သေ



ပြီးခဲ့သည့် သောကြာနေ့က သျှမ်းပြည်တောင်ပိုင်း ဟိုပုံးမြို့နယ် နမ့်ခုတ်အုပ်စုအတွင်း၌ သျှမ်းပြည်ပြန်လည်ထူထောင်ရေး ကောင်စီ သျှမ်းပြည်တပ်မတော်နှင့် မြန်မာအစိုးရစစ်တပ်တို့ တိုက်ပွဲ ၂ ကြိမ်ဖြစ်ပွါးရာ ၂ ဘက်အကျအရှုံးရှိခဲ့ကြောင်း ဒေသတွင်းသတင်းရပ်ကွက်ကဆိုပါသည်။

“ မေလ ၁၇ ရက် သောကြာနေ့တုန်းကလေ။ ဟိုပုံးမြို့နယ် နမ့်ခုတ်အုပ်စုထဲမှာ သျှမ်း နဲ့ ဗမာ  တိုက်ပွဲ ၂ ကြိမ်ဖြစ်တယ်။ ဗမာဘက်က ၉ ယောက်သေတယ်။ ၁၀ ကျော်ဒဏ်ရာရတယ်။ သေနတ် ၂ လက်နဲ့ ကျည်ကပ် အများအပြား သျှမ်းတပ်က သိမ်းဆည်းရမိတယ်။ ကျောပိုးအိတ်တွေလဲပါတယ်ပြောတယ်။ သျှမ်းဘက်က ၁ ယောက်သေတယ်။ ဒဏ်ရာရတာတော့ မရှိဘူး” ဟု RCSS/SSA နှင့်နီးစပ်သည့် ပအိုဝ်းပြည်သူ့စစ်တပ်ဖွဲ့ဝင်တဦးက ပြန်လည်ပြောပြသည်။


ကြိုတင်သတင်းပေးပို့ခြင်းမရှိသော မြန်မာ့တပ်မတော်မှ အင်အား ၁၀၀ ကျော်က တောတွင်းဝင် ရောက်လှည့်လည် မွှေနှောက်ရာမှ ထိပ်တိုက်တွေ့မိပြီး ပစ်ခတ်မှုဖြစ်ပွါးခဲ့ခြင်း ဖြစ်ကြောင်း ဒေသခံတဦးကလည်း ပြောပါသည်။

မြန်မာ့တပ်မတော်မှာ ရပခတိုင်းလက်အောက်ခံ ပင်လောင်းအခြေစိုက်  ခလရ ၂၄၉ နှင့် လွယ်ကော်အခြေစိုက် ခလရ ၂၅၀ ပူးပေါင်းတပ်တို့ဖြစ်ကြောင်းလည်း ပအိုဝ်းပြည်သူ့စစ်က ဆက်လက်ပြောပြသည်။

“ တိုက်ပွဲ ၂ ခုလုံးက နမ့်ခုတ်အုပ်စုထဲမှာ ဖြစ်တာ။ နားပုံရွာမြောက်ဘက်မှာ မွန်းလွဲ ၂ နာရီကနေ ၄ နာရီအထိတကြိမ်နဲ့ ပြည်တော်ရွာမြောက်ဘက်မှာ ၃ နာရီ ကနေ ၇ နာရီအထိ တကြိမ်ဖြစ်တယ်။ သျှမ်းတပ်ရှိတဲ့ဘက်ကို သိသိကြီးနဲ့တက်သွား တာလေ။ တိုက်ပွဲဖြစ်တဲ့နေရာက ရပ်စောက်နယ်ဘက်နဲ့ နီးသွားတယ် ။ ဟိုပုံးမြို့နယ်ထဲမှာဘဲ  ” ဟု  ၎င်းက ဆက်ပြော သည်။

၎င်းနှင့်ပတ်သက်၍ RCSS/SSA ဘက်မှ အတည်ပြုချက်တော့ မရသေးပေ။

သျှမ်းပြည်ပြန်လည်ထူထောင်ရေးကောင်စီသည် အစိုးရနှင့် ပြည်ထောင်စုအဆင့် ငြိမ်းချမ်းရေးတည်ဆောက်ထား သည့်အဖွဲ့ ဖြစ်သည်ဟုဆိုသော်လည်း ၂၀၁၁ ခုနှစ် အစိုးရတပ်မတော်နှင့်အပစ်အခတ်ရပ်စဲရေး ဆွေးနွေးသဘောတူကြပြီးသည့်နောက် ယနေ့တိုင်အောင် အစိုးရတပ်မတော်နှင့် လက်အောက်ခံပြည်သူ့စစ်တပ်ဖွဲ့တို့အား ခုခံတိုက်ခိုက်နေရသည်မှာ တိုက်ပွဲပေါင်း အကြိမ် ၈၀ ထက်မနည်းရှိပြီဖြစ်ကြောင်း ပြောခွင့်ရဗိုလ်မှူးလောင် (ဝ်) ဆိုင်က ပြောပြဖူးပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။