Thursday, May 2, 2013

ချင်းအမျိုးသား ညီလာခံကျင်းပရန် ချင်းပါတီ ၅ ခု ဆွေးနွေးကြမည်

(ဧရာဝတီ)

ချင်း တိုင်းရင်းသား လက်နက်ကိုင်အဖွဲ့များ၊ ချင်းနိုင်ငံရေး အသိုင်းအ၀ိုင်းနှင့် ပါတီများပါဝင်သော အမျိုးသားညီလာခံ တရပ် ကျင်းပရန်အတွက် ချင်းပါတီ ၅ ခုက မေ ၃ ရက်နေ့တွင် ပထမဆုံး အကြိမ်အဖြစ် အကြိုညှိနှိုင်း ဆွေးနွေးကြမည် ဖြစ်ကြောင်း သိရသည်။

ချင်းအမျိုးသားပါတီ၊ ချင်းပြည်သူ့ပါတီ၊ ဇိုမီးအမျိုးသား ဒီမိုကရေစီအဖွဲ့ချုပ် (ဇိုမီးချင်းပါတီ)၊ တိုင်းရင်းသား လူမျိုးများ ဖွံ့ဖြိုးတိုးတက်ရေးပါတီနှင့် အရှိုချင်းအမျိုးသားပါတီ စသည့် ပါတီ ၅ ခုသည် ရန်ကုန် တော်ဝင်နှင်းဆီခန်းမတွင် တွေ့ဆုံကြမည် ဖြစ်သည်။


“အပစ်အခတ် ရပ်စဲရေးတွေသာမက နိုင်ငံရေး ဆွေးနွေးပွဲအဆင့်အထိ လုပ်လာတဲ့အခါမှာ ချင်းလူမျိုးတွေ အနေနဲ့ စိတ်ဝမ်းကွဲတာတွေ မဖြစ်ဘဲ တထပ်တည်း ကျနိုင်ဖို့ ဒီညီလာခံကိုလုပ်မှာပါ” ဟု ချင်းအမျိုးသားပါတီမှ အထွေထွေ အတွင်းရေးမှူး ဆလိုင်းကျဲဘစ်ထောင်းက ဧရာဝတီသို့ ပြောသည်။

ညီလာခံ၌ အစိုးရနှင့် တိုင်းရင်းသား လက်နက်ကိုင်အဖွဲ့များ အကြားတွင် အပစ်အခတ် ရပ်စဲရေးထက် မြင့်မားသော နိုင်ငံရေး အဆင့်အထိ ဆွေးနွေးရာ၌ ပါတီများဘက်က အဓိကထား ဆွေးနွေးသင့်သည့် အကြောင်းအရာများကို ညှိနှိုင်း သွားမည် ဖြစ်ကြောင်းနှင့် ချင်းပြည်နယ်၏ ဆင်းရဲမွဲတေမှု အခြေအနေများ၊ လက်ရှိပေါ်ပေါက်နေသော ပြဿနာများအားလည်း ဆွေးနွေးသွားကြမည်ဟု အထွေထွေအတွင်းရေးမှူးက ဆိုသည်။

ယခုကျင်းပမည့် တွေ့ဆုံပွဲတွင် ချင်းလက်နက်ကိုင် အဖွဲ့တခုဖြစ်သော ချင်းအမျိုးသားတပ်ဦး (CNF) ပါဝင်ရန် မရှိသေးကြောင်း၊ ပြည်နယ် အသီးသီးက တိုင်းရင်းသားများ အနေဖြင့်လည်း ချင်းအမျိုးသား ညီလာခံကဲ့သို့ ပြုလုပ်ရန် ကြိုးပမ်းနေကြကြောင်းနှင့် လူမျိုးစု ညီလာခံများ ပြီးဆုံးသွားပါက တနိုင်ငံလုံးမှ တိုင်းရင်းသားများ စုပေါင်း၍ တိုင်းရင်းသားပေါင်းစုံ ညီလာခံကြီး တခု ပြုလုပ်ကျင်းပရန်လည်း အစီအစဉ် ရှိကြောင်း သိရသည်။

“ဒီညီလာခံကနေ ချင်းလူမျိုးစုလက်ခံနိုင်တဲ့ ဘုံရပ်တည်ချက် တခုကို ရအောင်လုပ်မှာပါ၊ တောင်းဆိုမှုတွေ လုပ်တဲ့အခါမှာ တယောက်တပေါက် မဖြစ်ရအောင် ဒီရပ်တည်ချက်နဲ့သွားမယ်” ဟု အရှိုချင်း အမျိုးသားပါတီမှ အထွေထွေအတွင်းရေးမှူး ဆလိုင်းအောင်မင်းလှိုင်က ပြောသည်။

အရှိုချင်းပါတီ အထွေထွေအတွင်းရေးမှူးက လက်ရှိတွင် ချင်းပါတီများ အနေဖြင့် အချင်းချင်း စိတ်ဝမ်းကွဲပြားမှု အလွန်နည်းပြီး ပါတီလုပ်ငန်းစဉ်နှင့် ပတ်သက်၍ လုပ်နည်းလုပ်ဟန် ကွဲပြားခြင်း မျိုးသာ ရှိကြောင်း ဆိုသည်။

ချင်းပါတီများထဲတွင် ချင်းအမျိုးသားပါတီနှင့် ချင်းပြည်သူ့ပါတီတို့က ပါတီတခုတည်းအဖြစ် ပေါင်းစည်းရန် သဘော တူညီမှု ရရှိခဲ့ကြောင်း ၂၀၁၂ ခုနှစ်ကတည်းက ထုတ်ဖော် ပြောကြားခဲ့ပြီး ယခုနှစ် ဧပြီလ ၂၉ ရက်နေ့က ကျင်းပသည့် ပါတီနှစ်ခု အစည်းအဝေး ပွဲတွင် ပါတီသစ်၏ နာမည်ကို ယာယီအားဖြင့် သတ်မှတ်နိုင်ခဲ့ကြောင်း၊ ပေါင်းစည်းမည့် ပါတီအသစ်၏ အမည်ကို “ချင်းအမျိုးသား တိုးတက်ရေးပါတီ” ဟု ပေးထားပြီး ယာယီသဘော တူညီချက် ၆ ချက် ရထားကြောင်းနှင့် ပါတီသစ်နာမည်အား ပြည်ထောင်စု ရွေးကောက်ပွဲကော်မရှင်ထံ တင်ပြ၍ ပါတီသစ်၏ ခေါင်းဆောင်များကို ပါတီနှစ်ခု အတွင်းမှနေ၍ အများဆန္ဒဖြင့် ရွေးချယ် တင်မြှောက်သွားမည်ဖြစ်ကြောင်း သိရသည်။

“ပါတီကို ဖျက်သိမ်းတာက ရတယ်၊ ဒါပေမယ့် ပါတီနှစ်ခုပေါင်းတဲ့ နည်းဥပဒေကို ပြန်လည်ပြင်ဆင်ရမယ့် အပိုင်းတွေ ရှိနေလို့ ဒီပေါင်းစည်းရေးကို အလျင်စလို မလုပ်ဖို့ ရွေးကောက်ပွဲကော်မရှင် ဥက္ကဋ္ဌက ကျနော့်ကို ပြောထားပါတယ်” ဟု ချင်းပြည်သူ့ပါတီ၏ အထွေထွေအတွင်းရေးမှူး ဦးသိုက်ထွန်းက ပြောသည်။

လက်ရှိကာလတွင် ချင်းပြည်နယ် တောင်ပိုင်းရှိ မင်းတပ်မြို့၊ မတူပီမြို့၊ ကန်ပက်လက် မြို့နယ်များ အပါအ၀င် နေရာအနှံ့တွင် ရေရှားပါးမှုများ ကြုံတွေ့နေရကြောင်း နှင့် မတူပီမြို့တွင်သာ အစိုးရငွေဖြင့် ရေပေးဝေရေး လုပ်ငန်းများ လုပ်ဆောင်နေကြောင်း သိရသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။